وزیراعلیٰ پنجاب عثمان بزدار نے موٹروے پر خاتون سے زیادتی کے کیس پر تحقیقات کے لیے 5 رکنی کمیٹی تشکیل دے دی    ہے۔

پنجاب حکومت کے نوٹیفکیشن کے مطابق پر خاتون سے زیادتی کے معاملے پر وزیراعلیٰ  کی قائم کردہ کمیٹی میں ایڈیشنل چیف سیکرٹری ہوم، ایڈیشنل آئی جی اسپیشل برانچ ،ڈی آئی جی انویسٹی گیشن پنجاب ڈاکٹر مسعود سلیم اور ڈی جی فرانزک ایجنسی شامل ہیں۔

 نوٹیفیکیشن کے مطابق وزیر قانون راجہ بشارت کمیٹی کے کنونیر ہیں جبکہ کمیٹی تین روزمیں تحقیقات کرکے اپنی رپورٹ وزیراعلیٰ کو پیش کرے گی اور آئندہ ایسے واقعات کی روک تھام کے لیے سفارشات بھی مرتب کرے گی۔

دوسری جانب آئی جی پنجاب انعام غنی نے کیس پر تحقیقات آگے بڑھانے کیلئے 6 رُکنی اسپیشل انویسٹی گیشن ٹیم تشکیل دے دی۔

نوٹیفیکیشن کے مطابق ٹیم ڈی آئی جی انویسٹی گیشن شہزادہ سلطان کی سربراہی میں کام کرے گی اور ٹیم کے ممبران میں ایس ایس پی ذیشان اصغر، ایس پی اسپیشل برانچ جہانزیب ،ایس پی سی ٹی ڈی نصیب اللہ خان ،ایس پی سی آئی اے عاصم افتخار اور انچارج جینڈر کرائمز مِس فضہ اعظم شامل ہیں جبکہ ٹیم کے سربراہ فرانزک ماہرین کی خدمات بھی حاصل کر سکتے ہیں۔

واضح رہے کہ  9 ستمبر کو لاہور کے علاقے گجر پورہ میں موٹر وے پر خاتون کو اجتماعی زیادتی کا نشانہ بنایا گیا تھا۔

میڈیا رپورٹس کے مطابق دوافراد نے موٹر وے پر کھڑی گاڑی کا شیشہ توڑ کر خاتون اوراس کے بچوں کو نکالا، موٹر وے کے گرد لگی جالی کاٹ کر سب کو قریبی جھاڑیوں میں لے گئے اور پھر خاتون کو بچوں کے سامنے زیادتی کا نشانہ بنایا۔

پولیس کے مطابق زیادتی کا شکار خاتون کے میڈیکل ٹیسٹ میں خاتون سے زیادتی ثابت ہوئی ہے۔