پاک بحریہ کے سربراہ ایڈمرل ظفر محمود عباسی نے ورلڈ میری ٹائم ڈے 2020ء کے موقع پر اپنا پیغام جاری کیا ہے جس میں انہوں نے سمندر کی اہمیت اور تحفظ پر زور دیا ہے۔

امیرالبحر نے کہا ہے کہ اس سال میری ٹائم کے عالمی دن کا موضوع ’مستحکم کرۂ ارض کیلئے مستحکم جہاز رانی‘ ہے، بین الاقوامی معیشت کا زیادہ تر انحصار جہاز رانی سے متعلقہ سرگرمیوں پر ہے۔

نیول چیف کا کہنا ہے کہ قدرت نے پاکستان کو ایک ہزار کلومیٹر سے زائد طویل ساحلی پٹی سے نوازا ہے، پاک چین اقتصادی راہداری سے بھرپور استفادے کیلئے ملک میں بحری شعبے کی ترقی ناگزیر ہے۔

انہوں نے کہا کہ پاک بحریہ سمندری دفاع کے ساتھ ساتھ ملک میں میری ٹائم کے شعبے سے متعلق آگاہی اور بلیو اکانومی کے فروغ کیلئے سرگرم ہے۔

ایڈمرل ظفر محمود عباسی نے کہا کہ حکومتِ پاکستان کی جانب سے 2020ء کو بلیو اکانومی کا سال قرار دینا ایک مثبت قدم ہے۔

نیول چیف نے اپنے پیغام میں کہا ہے کہ سمندری تحفظ کے روایتی اور غیر روایتی چیلنجز کے ساتھ ساتھ بڑھتی ہوئی سمندری آلودگی ایک سنگین مسئلہ ہے۔

انہوں نے کہا کہ ان مسائل کے حل کیلئے تمام ساحلی ممالک کی جانب سے مشترکہ کوششوں کی ضرورت ہے، پاک بحریہ ریجنل میری ٹائم سیکیورٹی پٹرول کے ذریعے علاقائی سمندری تحفظ کو یقینی بنانے میں اہم کردار ادا کر رہی ہے۔

سربراہ پاک بحریہ نے مزید کہا ہے کہ بندرگاہوں کی صفائی، سمندر میں تیل کے رساؤ کی روک تھام اور ساحلی علاقوں میں مینگرووز کی شجرکاری سمندری ماحولیاتی نظام کے تحفظ کیلئے پاک بحریہ کے اہم اقدامات ہیں۔

ایڈمرل ظفر محمود عباسی کا مزید کہنا ہے کہ پاک بحریہ سمندری شعبے کی ترقی بالخصوص جہاز رانی کی صنعت کے فروغ کیلئے بھرپور تعاون کے عزم کا اعادہ کرتی ہے۔