وزیراعظم عمران خان نے ذخیرہ اندوزوں کے خلاف کریک ڈاؤن کا حکم دیا ہے۔

تفصیلات کے مطابق وزیراعظم عمران خان کی زیر صدارت آٹے اور چینی کی صورتحال پر اجلاس ہوا جس میں وزیراعظم کو گندم اور چینی کی صورتحال پر بریفنگ دی گئی۔

اجلاس میں وزیراعظم کو گندم اور چینی کی دستیابی پر بریفنگ دیتے ہوئے کہا کہ گندم کچھ درآمد کرچکے ، باقی آنا باقی ہے۔

وزیراعظم نے اشیائے خوردونوش کی قیمتوں میں اضافے پر تشویش کا اظہار کیا جبکہ ذخیرہ اندوزوں کے خلاف کریک ڈاؤن کا بھی حکم دیا۔

اجلاس کی صدارت کرتے ہوئے وزیراعظم عمران خان نے کہا کہ خود ساختہ قیمتوں میں اضافہ کرنے والوں کے خلاف کاروائی کی جائے۔

وزیراعظم نے چیف سیکرٹری پنجاب کو ہدایت کرتے ہوئے کہا کہ گنے کی کرشنگ کی تاریخ کا جلد از جلد اعلان کیا جائے جبکہ گنے کی سرکاری قیمت کا اعلان بھی جلد از جلد کیا جائے۔

عمران خان نے کہا کہ صوبائی حکومتیں گندم کی ریلیز کو مزید بڑھائے جبکہ مارکیٹ میں وافر مقدار میں گندم کی دستیابی کو یقینی بنایا جائے۔

وزیراعظم عمران خان نے مزید کہا کہ درآمدکی جانے والی گندم کے ملک میں پہنچنے کا تفصیلی شیڈول پیش کیا جائے جبکہ چینی ملوں میں موجود سٹاک کی فزیکل ویری فیکیشن کرائی جائے۔

وزیراعظم عمران خان کی زیر صدارت ہونے والے اجلاس میں وفاقی وزرا، مشیر، معاونین شریک ہوئے۔

واضح رہے اس سے قبل وزیر اعظم عمران خان کی زیر صدارت وفاقی کابینہ کا اجلاس ہوا جس میں کابینہ میں مہنگائی کی شرح ،ریلوے اور پی آئی کی بحالی سمیت اہم قومی معاملات پر غور کیا گیا۔

کابینہ اجلاس میں چینی ،آٹا  کی قیمتوں میں اضافہ کے معاملہ پر کھل کر بات چیت کی گئی جبکہ کابینہ ارکان نے ڈاکٹروقار مسعود کی معاون خصوصی ریونیو تقرری کا خیر مقدم کیا۔

کابینہ کو بریفنگ دیتے ہوئے کہا گیا کہ اور حکومت اشیائے خوردونوش کی قیمتوں میں کمی کے لئے اہم اقدامات اٹھائے گی چینی اور آٹا سمیت کچھ اشیاء مہنگی ہوئی ہیں۔