وزیرِ اعظم عمران خان نے کہا ہے کہ حکومت اقلیتی برادری سے تعلق رکھنے والے شہریوں کے آئینی و قانونی حقوق کے تحفظ کے لیے پر عزم ہے۔

تفصیلات کے مطابق وزیرِ اعظم عمران خان سے چئیرمین قومی اقلیتی کمیشن چیلا رام کیلانی کی قیادت میں کمیشن کے وفد کی ملاقات ہوئی جس میں قومی اقلیتی کمیشن کے کردار کو مزید مستحکم کرنے کے حوالے سے بات چیت کی گئی۔

 چئیرمین قومی اقلیتی کمیشن چیلا رام کیلانی سے ملاقات میں وزیراعظم نے کہا کہ مذہبی رواداری  اور  بین المذاہب ہم آہنگی کا فروغ وقت کی اہم ضرورت ہے۔

عمران خان نے یہ بھی کہا کہ ملک دشمن عناصر مذہب کی آڑ میں معاشرے میں انتشار پھیلانے کی کوششوں میں ہیں جسے ہم سب نے ملکر ناکام بنانا ہے اور قومی کمیشن برائے اقلیت اپنا بھرپور کردار ادا کرے گا۔

وزیراعظم عمران خان نے مزید کہا کہ حکومت اقلیتی برادری سے تعلق رکھنے والے شہریوں کے آئینی و قانونی حقوق کے تحفظ کے لیے پر عزم ہے، اس حوالے سے تمام اقدامات اٹھائے جائیں گے۔

وفد میں وزیرِ برائے مذہبی امور پیر نور الحق قادری، مولانا  سید محمد عبدالخبیر آزاد، مفتی گلزار احمد نعیمی، جئےپال چھبڑیا ، وشنو راجا قوی، ڈاکٹر سارہ صفدر، آرچ بشپ سبیسشن فرانسس شا، البرٹ ڈیوڈ، ڈاکٹر پمپل سنگھ، سروپ سنگھ، روشن خورشید بھاروچہ ، داؤد شاہ، چیئرمین اسلامی نظریاتی کونسل ڈاکٹر قبلہ ایاز، پارلیمانی سیکرٹری  شنیلہ رتھ و دیگر شریک ہوئے۔