وزیر اعظم عمران خان سے سندھ کے ارکان قومی و صوبائی اسمبلی کی ملاقات ہوئی جس میں تحریک انصاف نے سندھ حکومت کو ہوم گراونڈ میں جواب دینے کا پلان تیار کیا جبکہ پلان پر آئندہ ہفتے عمل ہوگا۔

اس موقع پر وزیر اعظم عمران خان نے گورنر سندھ ،ارکان اسمبلی اور وزراء کو الگ الگ ٹاسک دیدیا جبکہ سندھ پولیس کے معاملے کو سندھ حکومت کا خودساختہ بحران قرار دیدیا۔

وزیر اعظم عمران خان نے صوبائی لیڈر شپ اور وفاقی وزراء کو بھی سندھ کے میدان میں اتارنے کا فیصلہ کیا جبکہ سندھ حکومت کو ٹف ٹائم دینے کا بھی فیصلہ کیا گیا۔

ملاقات میں فیصلہ کیا گیا کہ گندم بحران کی  سندھ حکومت بھی ذمہ دار ،معاملہ عوام کے سامنے لایا جائے گا جبکہ اسمبلی کے اندر اور باہر سندھ حکومت کو آڑے ہاتھوں لیا جائے گا۔

ملاقات میں یہ فیصلہ بھی کیا گیا کہ وفاقی وزراء ہر ہفتے سندھ کا دورہ کریں گےاور پارٹی کے مظاہروں میں شریک ہوں گے جبکہ سندھ کا سب س پہلا دورہ وفاقی وزیر  اسد عمر اور عمر ایوب آئندہ ہفتے کریں گے۔

ذرائع کا کہنا ہے کہ اجلاس میں کہا گیا ہے کہ سندھ حکومت کے خلاف سندھ میں جلسے، مظاہرے اور ریلیاں نکالی جائیں گی جبکہ جلسوں اور مظاہروں میں سندھ حکومت کی کرپشن کو بے نقاب کیا جائے گا۔

وزیر اعظم عمران خان نے جزائرسے متعلق معاملات پر ارکان سندھ اسمبلی کو اعتماد میں لیا اور کہا کہ جزائر سے متعلق پروپیگنڈہ گمراہ کن ہے ،جواب دیا جائے۔

وزیر اعظم عمران خان نے مزید کہا کہ سندھ حکومت نے معاملے کو نیا رنگ دیکر سیاسی فائدہ اٹھایا کیونکہ میں سندھ پولیس کے معاملے پر پوری نظر ہے جبکہ کیپٹن صفدر کی گرفتاری کے معاملے سے بھی اچھی طرح باخبر ہوں۔