اکثر والدین اس پریشانی میں مبتلا ہوتے ہیں کہ ان کے بچوں کے بال بڑھنا رُک گئے ہیں اور انہوں نے جو ہئیر اسٹائل بچوں کے بالوں کیلئے سوچا ہوا ہوتا ہے وہ نہیں بنا پاتے۔

ایسے والدین جو بچوں کے بال نہ بڑھنے کی وجہ سے پریشان ہین وہ چند تدابیر پر عمل کرکےبچوں کے  بالوں کی نشونما قدرتی طور پر بڑھا سکتے ہیں۔

بچوں کے بال کلپ یا پونی میں نہ باندھیں

عام طور پر دیکھا جاتاہے کہ ماوں نے چھوٹی بچوں کے بال کلپ یا پونی کی صورت میں کسے ہوئے ہوتے ہیں جو کہ تناو کا سبب بنتا ہے  اور ایسا کرنے سے بالوں کی جڑیں کمزور ہوجاتی ہیں۔ والدین کو چاہیئے کہ وہ بچوں کے بال کس کے نہ باندھیں۔

کھوپرے کا تیل انتہائی موزوں

کھوپرے کا تیل لگانے میں ہلکا ہوتا ہے اور یہ بچوں کے سر کی نرم جلد میں موجود مسائل میں کمی لاتا ہے،  والدین کوشش کریں کہ روزانہ باقاعدگی سے بچوں کے سر پر کھوپرے کے تیل کا مساج کریں تاکہ ان کے بال مضبوط بنیں، ان میں چمک آئے اور ان کی نشونما میں اضافہ ہو۔

بالوں میں احتیاط سے برش پھیریں

بچوں کے بالوں کی جڑیں انتہائی نازک ہوتی ہیں ، عام طور پر چند ماہ کے بچوں کے بال بہت کم ہوتے ہیں ایسے میں والدین کیلئے کوئی پریشانی کی بات نہیں بلکہ وہ دندانوں والے برش سے آہستگی کے ساتھ کنگھی کریں۔ برش پھیرنے کی وجہ سے ان کے سر میں خون کی گردش بڑھے گی اور ان کے بالوں کی نشونما میں اضافہ ہوگا ۔ بالوں میں کنگھی کرنے سے قبل یہ ضرور دھیان رکھیں کہ ان کے بالوں میں تیل لگا ہوا ہو اور ہلکے ہاتھوں سے مساج کرنے کے بعدہی ان کے کنگھا پھیریں۔

وٹامن ای کے آئل لگائیں

وٹامن ای کے آئل لگا کر بھی بچوں کے بالوں کو قدرتی طور پر مضبوط اور خونصورت بنایا جاسکتا ہے۔وٹامن ای آئل میں وہ تمام خصوصیات موجود ہوتی ہیں جو کہ بچوں کے بالوں کو تیزی سے بڑھانے کا باعث بنتی ہیں ۔ چند قطرے وٹامن ای آئل کو کھوپرے کے تیل میں ملاکر بچوں کے سر میں اس کا مساج کریں ۔ وٹامن ای آئل سر کی جلد کو مناسب نمی فراہم کرتا ہے اور بالوں کو مضبوط بناتا ہے۔

مناسب شیمپو کا استعمال

بالوں کی خوبصورتی میں شیمپو بھی ایک خاس کردار ادا کرتا ہے، خیال رہے کہ بچوں کے سر کی جلد صاف ستھری ہوگی تب ہی بالوں کی نشونما ہوپائے گی۔ بچوں کے سر کو بے بی شیمپو کی مدد سے دھوئیں ۔ ان کے سر کی جلد کو صاف رکھیں ۔ بہتر یہ ہے کہ بچو ں کیلئے ڈاکٹر سے کوئی شیمپو لکھوا لیں۔