پاک سرزمین پارٹی (پی ایس پی) کے سربراہ مصطفیٰ کمال نے کہا ہے کہ ملک میں اقتدار بچانے اور گرانے کا گیم آن ہے۔ اپوزیشن اور حکومت نام کی کوئی چیز نہیں ہے۔

مصطفیٰ کمال نے میڈیا سے گفتگو کرتےہوئے کہا کہ عوام کو بے وقوف بنایا جارہا ہے، آپ لوگ بیک ڈور رابطے کررہے ہیں، حکومت سے نجات حاصل کرنا چاہتے ہیں آپ استعفیٰ دیں ،حکومت ختم ہوجائے گی۔

انہوں نے کہا کہ گزشتہ روز کے جلسے میں کراچی کے مسائل پر کوئی بات نہیں کی گئی، کراچی میں کتوں کے کاٹنے کی ویکسین بھی دستیاب نہیں، پیپلز پارٹی کے رہنما گزشتہ روز ایسے تقریر کر رہے تھے جیسے وہ کبھی حکومت میں نہیں رہے۔

ان کا کہنا تھا کہ کراچی میں لسانی بنیادوں پر7 اضلاع بنائے گئے ہیں، گزشتہ سال این ایف سی ایوارڈ میں سندھ کو800 ارب روپے ملے۔

انہوں نے کہا کہ مردم شماری میں کراچی کے عوام کی گنتی تک درست نہیں کی گئی، کراچی میں ہونے والے جلسے میں مردم شماری سے متعلق معاملے پر بات نہیں کی گئی۔

مصطفیٰ کمال کا کہنا تھا کہ وزیراعظم عمران خان نے کراچی کےلیے 1100 ارب روپے کا پیکج دیا، اسی دن کہا تھا پیکج لالی پوپ ہے۔

پی ایس پی کے سربراہ نے کہا کہ کراچی میں گیس اور بجلی سب سے زیادہ مہنگی ہے اور اب حکومت نے بجلی مزید مہنگی کردی ہے۔

سربراہ پی ایس پی نے کہا کہ سندھ میں 70 لاکھ بچے اسکولوں سے باہر ہیں جب کہ صرف کراچی میں11 ہزار گھوسٹ اسکول ہیں۔