جمعیت علمائے اسلام (ف) کے سربراہ مولانا فضل الرحمان کا کہنا ہے کہ جعلی حکمران اپنے انجام کو پہنچنے والے ہیں، عوام کا بپھرا ہوا سمندر جعلی حکمرانوں کی کشتی کو غرق کرکے دم لے گا، اب عوام کا سمندر کراچی، کوئٹہ، لاہور اور پشاور میں آئے گا۔

گوجرانوالہ میں پی ڈی ایم کے زیر اہتمام منعقدہ جلسہ عام سے خطاب کرتے ہوئے مولانا فضل الرحمان نے کہا کہ جمہوریت کے خوبصورت چہرے کو گرد آلود کیا گیا، اب جمہوریت کی صبح طلوع ہونے والی ہے۔

انہوں نے پاکستان مسلم لیگ (ن) کا شکریہ ادا کرتے ہوئے کہا کہ میں بہترین میزبانی پر ن لیگ کا شکر گزار ہوں، گوجرانوالہ پہلوانوں کا شہر ہے اور پہلوان اکھاڑے میں اتر چکے ہیں۔

مولانا فضل الرحمان نے کہا کہ ہم پاکستان کی سیاست کو قوم کے ہاتھوں میں دیکھنا چاہتے ہیں، حکومت انشاﷲ یہ آنے والا دسمبر نہیں دیکھیں گے۔

انہوں نے کہا کہ پاکستانی قوم کے حق پر ڈاکہ ڈالا گیا ہے، آج معیشت زبوں حالی کی انتہا پر ہے، ساحلی اور سمندری علاقوں کو صوبوں کے اختیار سے باہر کیا جارہا ہے جو آئین کے خلاف ہے، ہر صوبے کے عوام اپنے صوبے کے وسائل کے مالک ہیں۔

ملکی معیشت کا ذکر کرتے ہوئے فضل الرحمان کا کہناتھا کہ دو سالوں میں آپ نے جو بجٹ پیش کیے وہ آئی ایم ایف کا تیار کردہ ہے، آپ نے جو قانون سازی کی وہ ایف اے ٹی ایف کے دباؤ کی وجہ سے کی۔

مولانا فضل الرحمان کا کہنا تھا کہ جب اے پی سی ہوئی انہوں نے کہا کہ آج انڈیا بڑا خوش ہے، تم نے کشمیر کو انڈیا کے ہاتھوں بیچا،انڈیا نے تو اس دن عید منائی تھی، انڈیا نے کشمیر پر قبضہ کیا، تم نے اسے خاموشی سے قبول کرلیا، اے پی سے پر انڈیا خوشی نہیں منا سکتا، انڈیا نے پاکستان کے عام انتخابات میں دھاندلی پر خوشیاں منائیں۔ آج انڈیا میں ماتم بچھ رہا ہے کہ آج پاکستان میں پھر جمہوریت کی بات کی جارہی ہے۔