تحریک لبیک کے سربراہ علامہ خادم حسین رضوی کی نماز جنازہ آج بروز ہفتہ صبح 11بجے مینار پاکستان گراؤنڈ میں ادا کی جائے گی۔

تفصیلات کے مطابق علامہ خادم حسین رضوی کی نماز جنازہ کے انتظامات مکمل کرلئے گئے۔

علامہ خادم رضوی کے  بیٹے و ڈپٹی سیکرٹری جنرل تحریک لبیک حافظ سعد حسین رضوی نے بتایا کہ جنازہ بذریعہ ایمبولینس ہی رہائش گاہ سے مینار پاکستان گرائونڈ لایا جائیگا اور تدفین مسجد رحمت اللعالمین سے ملحقہ مدرسہ ابوذر غفاری میں کی جائیگی جبکہ حکومتی اعلان کے مطابق خادم حسین رضوی کی میت کو ایمبولینس میں سبزہ زار لیجایا جائیگا وہاں سے بذریعہ ہیلی کاپٹر مینا ر پاکستان گرائونڈ لایا جائیگا۔

مولانا خادم حسین رضوی کا جسد خاکی سکیم موڑ چوک یتیم خانہ میں واقع مسجد سے ملحقہ گھر میں رکھا گیا ، مسجد اور علاقے میں سیکیورٹی کے سخت انتظامات کیے گئے ہیں اور بھاری نفری تعینات کی گئی جبکہ دو رویہ سڑک کو بھی ٹریفک کیلئے بند کر دیا گیا ہے لیکن اورنج لائن میٹر و ٹرین بند نہیں کی گئی۔ مسجد کے باہر خادم حسین رضوی کے چاہنے والوں کی ایک بڑی تعداد موجود رہی۔

نماز جنازہ کے موقع پر پولیس کی جانب سے سکیورٹی پلان تشکیل دے دیا ہے۔ گریٹر اقبال پارک کے پانچوں گیٹ پر بھاری نفری تعینات کی جائے گی، امن و امان کی صورتحال کو قابو میں رکھنے کے لیے 50 ریزرویں تعینات کی جائیں گی۔

خیال رہے کہ  نماز جنازہ کے موقع پر ایلیٹ فورس کے کمانڈوز کے علاوہ اینٹی رائٹ فورس اور سٹی ٹریفک پولیس کے اہلکار بھی تعینات ہونگے۔