وزیر اعظم عمران خان نے کہا ہے کہ ہم کشمیریوں کے ساتھ کھڑے ہیں اور انکی ہر سطح پر حمایت جاری رکھیں گے۔

تفصیلات کے مطابق وزیر اعظم عمران خان سے صدر پی ٹی آئی کشمیر بیرسٹر سلطان محمود چوہدری کی ملاقات ہوئی جہاں بیرسٹر سلطان محمود چوہدری نے وزیر اعظم عمران خان کو گلگت بلتستان کے انتخابات میں پی ٹی آئی کی کامیابی پر مبارکباد دی۔

اس موقع پر وزیر اعظم عمران خان کو آزاد کشمیر کی سیاسی صورتحال، آزاد کشمیر کے آئندہ آنے والے انتخابات ، پارٹی کے تنظٰمی امور پر بھی بریفنگ دی۔

وزیر اعظم عمران خان نے ہدایت کی کہ بیرسٹر سلطان ابھی سے آزاد کشمیر میں پی ٹی آئی کی انتخابی مہم شروع کر دیں۔

وزیر اعظم عمران خان نے کہا کہ بھارت کو دفاعی پوزیشن پر لائیں گے جبکہ مقبوضہ کشمیر میں جاری بھارتی مظالم کے لئے ہر فورم پر آواز اٹھائیں گے۔

عمران خان نے یہ بھی کہا کہ آئندہ کشمیر پر مذاکرات سہ فریقی ہونگے اور ان مذاکرات میں کشمیری بھی شریک ہونگے جبکہ کشمیریوں کے حق خود ارادیت کے لئے عالمی سطح پر کوششیں جاری رکھیں گے۔

وزیر اعظم عمران خان کا مزید کہا کہ ہم نے گلگت میں انتخابی مہم دیر سے چلائی ، آزاد کشمیر میں ہم ابھی سے اس پر کام شروع کریں گے۔

ملاقات میں بیرسٹر سلطان محمود چوہدری نے وزیراعظم عمران خان کا شکریہ ادا کیا۔

بیرسٹرسلطان محمود نے یہ بھی کہا کہ وزیراعظم آزاد کشمیر میں ہیلتھ کارڈ کے اجراء کا آغاز تقریب میں خود تشریف لا کر کریں جس پر وزیر اعظم عمران خان نے انصاف ہیلتھ کارڈ کے اجراء کی تقریب میں شرکت کی دعوت قبول کرلی۔

یاد رہے انصاف ہیلتھ کارڈ کے اجراء کی تقریب آئندہ چند روز میں منعقد کی جائے گی۔