وزیرِاعظم عمران خان نے کہا ہے کہ نالہ لئی کے توسیع منصوبے سے عوام کے مسائل کا حل ممکن ہوسکے گا۔

تفصیلات کے مطابق وزیرِ اعظم عمران خان کی زیر صدارت نالہ لئی کے توسیع منصوبے کا جائزہ اجلاس ہوا جس میں میں نالہ لئی کی توسیع، دونوں اطراف ایکسپریس وے، رنگ روڈ اور صنعتی زون منصوبوں پر تفصیلی بریفنگ دی گئی۔

 بریفنگ کے دوران کہا گیا کہ منصوبے پر تقریباً 79 ارب روپے کی لاگت کا تخمینہ لگایا گیا ہے اور نکاسی آب و ٹریٹمنٹ، دونوں اطراف جدید طرز پر تعمیرات، ٹریفک کی روانی کیلئے پُلوں اور انٹر چینجز کی تجاویز بھی منصوبے میں شامل ہیں۔

بریفنگ کے دوران یہ بھی کہا گیا کہ منصوبے سے مستقبل میں سیلابی صورتحال کی روک تھام میں مددملے گی جبکہ لئی ایکپریس وے منصوبہ بڑے پیمانے پر شہری آبادی سے متعلقہ مسائل کو حل  اور عام شہریوں کو ریلیف فراہم کرے گا۔

اجلاس میں وزیراعظم نے ڈاکٹر سلمان کو ہدایت دی کہ تمام شراکت داروں سے مشاورت کے بعد  حتمی تجاویز مرتب کرکے منظوری کے لیے پیش کی جائے۔

عمران خان نے کہا کہ نالہ لئی منصوبہ راولپنڈی کیلئے نہایت اہمیت کا حامل ہے جبکہ ہر سال آنے والے سیلاب سے ہونے والے نقصانات کی روک تھام ممکن ہوگی۔

وزیرِ اعظم عمران خان نے مزید کہا کہ گذشتہ کئی سالوں سے راولپنڈی شہر کی آبادی میں اضافے کے باعث مکینوں کو متعدد مسائل کا سامنا ہے جبکہ اس منصوبے سے سرمایہ کاری اور معاشی سرگرمیوں کو فروغ حاصل ہوگا۔

اجلاس میں حماد اظہر، اسد عمر، شیخ رشید اور سینئیر افسران نے شرکت کی۔