پاکستان کی معروف افسانہ و ناول نگار بانو قدسیہ کی سالگرہ پرگوگل نے اپنا ڈوڈل اُن کے نام کرکے انہیں زبردست  خراجِ عقیدت پیش کیا ہے۔

28 نومبر1928ء کو فیروز پور بھارت میں پیدا ہونے والی بانو قدسیہ کی آج  92 ویں سالگرہ منائی جا رہی ہے۔

سالگرہ کے موقع پرگوگل نے بانو قدسیہ سے منسوب اپنا ڈوڈل جاری کردیا ہے اورانہیں زبردست خراجِ عقیدت پیش کیا ہے۔

بانو قدسیہ کو بچپن ہی سے کہانیاں لکھنے کا شوق تھا اور پانچویں جماعت سے انہوں نے باقاعدہ لکھنا شروع کر دیا تھا۔

بانو قدسیہ نے معروف مصنف اور ادیب اشفاق احمد سے شادی کی، اردو میں ایم اے کرنے کے دوران ہی اشفاق احمد کی حوصلہ افزائی پر ان کا پہلا افسانہ ’آمادگیٔ شوق‘ شائع ہوا۔

یہ افسانہ 1950ء میں ادبی جریدے ’ادبِ لطیف‘ میں شائع ہوا، یہ اس دور کا سرکردہ جریدہ تھا۔

بانو قدسیہ اردو ادب کا وہ نام ہے جو ہمیشہ سنہرے حروف میں لکھا جائے گا، حساس طبیعت رکھنے والی بانو قدسیہ نے اردو اور پنجابی دونوں زبانوں میں لکھا۔

بانو قدسیہ کے ناولوں کی تعداد 30 ہے، پاکستان ٹیلی وژن کے لیے لکھے گئے ڈرامے اور نان فکشن تصانیف کی تعداد علیحدہ ہے۔ ان کے ناول ’راجہ گدھ‘ کو اردو ادب کے بڑے ناولوں میں شمار کیا جاتا ہے۔

بانو قدسیہ کی دیگر تصانیف میں شہرِ بے مثال، توجہ کی طالب، چہار چمن، امربیل، حاصل گھاٹ اور دیگر شامل ہیں۔

انہیں حکومت کی جانب سے ستارۂ امتیاز اور ہلالِ امتیاز سے نوازا گیا، بانو قدسیہ 4 فروری ء2017 کو اس جہان فانی سے رحلت فرما گئیں۔