مشیر خزانہ عبدالحفیظ شیخ نے کہا ہے کہ ہماری معیشت اوپر جا رہی ہے اور ہم نے مؤثر اقدامات سے کرنٹ اکاؤنٹ خسارے پر قابو پالیا ہے۔

تفصیلات کے مطابق مشیر خزانہ عبدالحفیظ شیخ نے کہا ہے کہ پاکستان کی 72 سالہ تاریخ میں سیاسی استحکام نہیں رہا۔ تاہم پی ٹی آئی حکومت نے مالیاتی نظم و ضبط کے لیے مشکل ترین فیصلے کیے۔

انہوں نے کہا کہ کورونا صورتحال میں پسماندہ طبقے کو ریلیف کی فراہمی حکومت کی اہم ترجیح تھی۔ پاکستان تحریک انصاف (پی ٹی آئی) حکومت کے آنے کے بعد پرائیوٹ سیکٹر سمیت ایکسپورٹرز کو فائدا ہوا۔

مشیر خزانہ نے کہا کہ حکومت نے احساس پروگرام کے تحت شفاف انداز میں مستحقین میں مالی امداد تقسیم کیں اور ہم معاشی سرگرمیاں جاری رکھنے کے خواہاں ہیں۔

انہوں نے کہا کہ ہمیں اداروں کے معاملات میں حکومتی مداخلت کو ختم کرنا ہو گا۔ معاشی ترقی میں پرائیوٹ سیکٹر کا کردار اہم ہے۔

مشیر خزانہ کا کہنا تھا کہ ملک میں روزانہ کی بنیاد پر 40 ہزار ٹن گندم ریلیز ہو رہی ہے جبکہ ملک میں 20 سے 22 لاکھ ٹن گندم کم پیدا ہوئی لیکن ملک میں اس وقت گندم کی کوئی کمی نہیں ہے۔

انہوں نےکہا کہ ہماری حکومت نے برآمدات میں اضافہ کیا اور کمزور طبقے کیلئے تاریخی پیکج دیے۔

گزشتہ روز مشیر خزانہ عبدالحفیظ شیخ نے کہا تھا کہ ہماری معیشت اوپر جا رہی ہے اور چاروں طرف سے ہمیں معیشت کی اچھی خبریں آرہی ہیں۔

ان کا کہنا تھا کہ جب حکومت ملی تو ایک بحرانی کیفیت تھی۔ آئی ایم ایف کے پاس جانے کا فیصلہ مجبوری میں کیا گیا۔