آذربائیجان نے آرمینیا سے شوشا شہر کا قبضہ چھڑوا لیا جس کے بعد باکو میں فتح کا جشن منایا گیا ہے۔

خبر رساں ایجنسی کے مطابق آذربائیجان کے مقبوضہ پہاڑی علاقے قاراباغ کے مرکزی حیثیت کے حامل علاقے شُوشا پر 28 سال بعد آرمینیا کا قبضہ ختم کرالیا گیا ہے۔

آذربائیجان کے صدر الہام علی یوف کے اعلان کے بعد آذربائیجان کے دارالحکومت باکو میں شہریوں نے فتح کا جشن منایا۔

 شوشا پر آرمینیا کا قبضہ ختم ہونے پر ترک صدر طیب ایردوان نے بھی آذربائیجان کو مبارکباد دی۔

شوشا پر آرمینیا کا قبضہ ختم ہونے پر ترکی میں بھی خوشی کا اظہار کیا جا رہا ہے۔ قومی اسمبلی کے اسپیکر مصطفیٰ شن توپ نے فتح شُوشا کے لیے جاری کردہ پیغام میں کہا ہے کہ  “شُوشا آذربائیجان کا ہے۔ اللہ مبارک کرے”۔

مصطفیٰ شن توپ نے بیان میں آذربائیجان کے صدر الہام علییف کے اس بیان کی بھی یاد دہانی کروائی ہے جس میں انہوں نے کہا تھا کہ 28 سال بعد  شوشا میں اذان کی آواز گونجے گی۔

ترکی کے جسٹس اینڈ ڈویلپمنٹ پارٹی کے ترجمان عمر چیلک نے جاری کردہ بیان میں کہا ہے کہ “آذربائیجان کی فوج نے پہاڑی قارا باغ کی آزادی میں کلیدی اہمیت کے حامل شہر شوشا کو آرمینی قبضے سے رہا کروا لیا ہے۔ برادر ملک آذربائیجان کو فتح مبارک ہو”۔

خیال رہے کہ آذربائیجان اور آرمینیاکے درمیان 27 ستمبر سے شروع ہونے والی اس کشیدگی کے باعث سینکڑوں افراد ہلاک ہو چکے ہیں جبکہ ہزاروں افراد نقل مکانی کرنے پر مجبور ہوئے۔