وزیراعظم عمران خان نے کہا ہے کہ اشیائے ضروریہ کی دستیابی اور قیمتوں کا تعین صوبائی اختیار ہے۔

تفصیلات کے مطابق وزیراعظم عمران خان کی زیر صدارت اجلاس ہوا جس میں اشیائے ضروریہ کی دستیابی اور قیمتوں  پر کنٹرول کے حوالے سے اٹھائے جانے والے اقدامات کا جائزہ لیا گیا جبکہ فلور ملز مالکان سے تفصیلی مشاورت کی گئی ہے۔

چیف سیکریٹری پنجاب نے گندم اور چینی کی صوبے میں دستیابی اور قیمتوں کے بارے تفصیلی بریفنگ دیتے ہوئے کہا کہ آٹے کی دستیابی کو یقینی بنانے  کے لیے تمام ضلعی انتظامیہ کے افسران مسلسل مانیٹرنگ کر رہے ہیں۔

چیف سیکرٹری پنجاب نے کہا کہ یومیہ 25,000 ٹن گندم کی پسائی اور مارکیٹ میں دستیابی کو یقینی بنایا جائے گا جبکہ چیف سیکرٹری خیبرپختونخوا نے کہا کہ صوبے کی اس وقت یومیہ 11,000 ٹن گندم کی کھپت ہے۔

 بریفنگ دیتے ہوئے کہا گیا کہ11لاکھ ٹن سٹاک میں موجود ہے اور آٹے کی قیمتوں کے حوالے سے فلور ملز کی جانب سے 10 سے 50 روپے فی 20 کلو تھیلے پر کمی کی آمادگی ظاہر کی گئی ہے۔

بریفنگ دیتے ہوئے کہا گیا کہ منافع خوری اور ذخیرہ اندوزی کرنے والوں کے خلاف 2400 ایف آئی آر درج کی جاچکی ہیں اور صوبائی حکومت کی جانب سے 5000 ٹن یومیہ گندم کی ریلیز یقینی بنائی جائے گی۔

اجلاس کی صدارت کرتے ہوئے وزیراعظم عمران خان نے کہا کہ غریب عوام کی سہولت مد نظر رکھتے ہوئے خود  خود اس امر کی نگرانی کر رہا ہوں اور حکومت کی ہر ممکنہ کوشش ہے کہ عوام کو ریلیف فراہم کیا جائے۔

وزیراعظم نے کہا کہ حکومت کی بھرپور کوشش ہے کہ معاشی میدان میں اس مثبت پیش رفت کے ثمرات کا فائدہ عوام کو میسر آئے جبکہ اس وقت تمام معاشی اعشاریے مثبت سمت میں ہیں۔

 عمران خان نے یہ بھی کہا کہ آٹے اور چینی کی صورتحال پر مسلسل نظر رکھی جائے جبکہ مستقبل کی ضروریات کے پیشگی انتظامات کو یقینی بنایا جائے۔

وزیراعظم عمران خان نے مزید کہا کہ درآمد شدہ چینی کی ملک کے مختلف حصوں میں  ترسیل کے حوالے  سے انتظامات کو یقینی بنایا جائے تاکہ ترسیل کا عمل کسی تاخیر کا شکار نہ ہو۔