وزیراعظم عمران خان نے کہا ہے کہ پاکستان اور ازبکستان کے تعلقات مذہبی، تاریخی اور ثقافتی ہیں۔

تفصیلات کے مطابق وزیراعظم عمران خان سے ازبکستان کے وزیر ٹرانسپورٹ کی ملاقات ہوئی جس میں دو طرفہ تعلقات، خطے میں سیکیورٹی صورتحال پر گفتگو کی گئی جبکہ ٹرانس افغان ریلوے لائن منصوبے پر بھی بات چیت ہوئی۔

ملاقات میں وزیراعظم نے ازبکستان کی طرف سے منصوبے پر مالی معاونت کو سراہا جبکہ تمام شعبوں میں تعاون بڑھانے کے عزم کا اعادہ کیا ۔

ازبکستان وزیر ٹرانسپورٹ نے ازبک صدر کا پیغام وزیراعظم کو پہنچایا اور کہا کہ ازبک صدر دورہ پاکستان کی خواہش  رکھتے ہیں جس پر وزیراعظم نے کہا کہ جلد ازبک صدر کے دورہ پاکستان کا منتظر ہوں۔

ازبکستان وزیر ٹرانسپورٹ نے ازبک صدر کی طرف سے وزیراعظم کو دورے کی دعوت دی۔

اس موقع پر وزیراعظم عمران خان نے کہا کہ پاکستان وسطی ایشیا کے ممالک سے تعلقات مزید بہتر بنانا چاہتا ہے جبکہ تجارت، سرمایہ کاری، توانائی میں تعاون بڑھائیں گے۔

عمران خان نے یہ بھی کہا کہ پاکستانی بندرگاہیں وسطی ایشیائی ممالک کو بحیرہ ہند تک رسائی کا موقع ہیں، خطے میں ترقی اور معاشی تعاون بڑھانے کے لیے مشترکہ کوشش کرنا ہوں گی۔

وزیراعظم عمران خان نے افغان امن عمل کیلئے پاکستان کی کوششوں پر بھی روشنی ڈالی اور کہا کہ شروع سے اس بات کا قائل ہوں کہ افغانستان کا کوئی ملٹری حل نہیں ہے۔

ازبکستان کے وزیر ٹرانسپورٹ کی وزیراعظم عمران خان سے ہونے والی ملاقات میں اعظم سواتی اور عبدالرزاق داود بھی شریک ہوئے۔