مائیکرو سافٹ کے بانی بل گیٹس نے عالمی وبا کورونا وائرس کے حوالے سے ایک اور پیشگوئی کرتے ہوئے کہا ہے کہ آئندہ 4 سے 6 ماہ مہلک وائرس کی وبا میں بدترین ثابت ہونے والے ہیں۔

امریکی نشریاتی ادارے کو انٹرویو دیتے ہوئے انہوں نے کہا کہ ‘اگلے 4 سے 6 مہینے وبا کے بدترین ثابت ہوسکتے ہیں، انسٹیٹوٹ فار ہیلتھ میٹرکس اینڈ ایولوشن نے 2 لاکھ اضافی اموات کی پیشگوئی کی ہے، اگر ہم اصولوں پر عمل کریں یعنی فیس ماسک پہنیں اور سماجی دوری کے اقدامات پر عمل کریں تو متعدد اموات کی روک تھام کی جاسکتی ہے’۔

بل گیٹس نے یہ پیشگوئی اس وقت کی جب کورونا وائرس کی روک تھام کے لیے ویکسینز کی تیاری میں خاطر خواہ پیشرفت سامنے آئی ہے۔

بل گیٹس کا یہ بھی کہناہے کہ 2021 کے وسط میں امریکا میں عالمی وبا کے حوالے سے حالات میں بہتری آئے گی۔

ان کا کہنا تھا ‘موسم بہار میں کیسز کی تعداد میں ڈرامائی کمی آسکتی ہے اور ممکن ہے کہ حالات معمول پر آنا شروع ہوجائیں’۔

انہوں نے مزید کہا کہ میرے خیال میں یہ وائرس دنیا میں موجود رہے گا اور ہمیں فیس ماسک کا استعمال کرنا ہوگا، دنیا کے ہر کونے سے وائرس کے خاتمے کے بعد ہی وبا کا خاتمہ ممکن ہوسکے گا۔

انہوں نے کہا کہ حالات 2022 کی پہلی ششماہی سے قبل معمول پر نہیں آسکیں گے۔

اس موقع پر ایک انٹرویو کے دوران بل گیٹس نے کہا ‘اس وائرس کے حوالے سے تشخیص، نئے طریقہ علاج اور ویکسین پر کام واقعی بہت متاثرکن ہے، اور اس کو دیکھ کر مجھے لگتا ہے کہ امیر ممالک میں ممکنہ طور پر 2021 کے آخر تک اس پر قابو پالیں گے جبکہ باقی دنیا میں اس کا خاتمہ 2022 کے آخر تک ہوگا’۔