وزیراعظم عمران خان کا کہناہے کہ پاکستان میں 50سال کے بعد دو بڑے ڈیمز بن رہے ہیں،ڈیمز بننے سے بجلی اور پانی کے مسائل میں کمی آئے گی۔

تفصیلات کے مطابق اسلام آباد میں وزیراعظم عمران خان نے تقریب سے خطاب کرتے ہوئے اس اندیشے کا اظہار کیا کہ مستقبل میں پاکستان کو پانی کے مسائل ہوں گے، ملک میں الیکشن کی منصوبہ بندی ہوئی لیکن ڈیم بنانے کی نہیں کی گئی جس کی وجہ سے ڈیم نہ بننے کی صورت میں ملک کو پانی کا مسائل کا سامنا کرنا پڑے گا۔

وزیراعظم کا کہناتھا کہ کوئی بھی ملک لانگ ٹرم پلانگ سے ترقی کرتا ہے، چین آج دنیا کی سب سے تیز بڑھتی ہوئی طاقت بن رہا ہے کیونکہ اس نے لانگ ٹرم پلاننگ کی پالیسی اپنائی۔

وزیراعظم کا کہناتھا کہ ہم پرگزشتہ 10سال کے قرضوں کا بوجھ ہے جس کا سود دینا پڑتاہے،حکومت ملی تو پاکستان پر 25ہزار ارب روپے کے قرضے تھے،ہماری حکومت نے 11ہزار ارب روپے کے قرضے لیے لیکن 6 ہزار ارب روپے قرضوں کےسود کی مد میں چلے گئے۔

وزیراعظم نے خطاب کے دوران مزید بتایا کہ روپیہ گرنے کی وجہ سے 3ہزار ارب روپے کے مزید قرضے چڑھ گئے ، 2ہزار ارب روپے میں سے 800ارب روپے ٹیکس کلیکشن میں چلے گئےجبکہ باقی پیسوں کے تحت ہم نے کورونا وبا کے دوران احساس پروگرام شروع کیا۔

وزیراعظم نے ماضی کی حکومتوں کی غلطیوں کی جانب نشان دہی کرتے ہوئے کہا کہ غلط فیصلے کیے گئے اور کسی اور کی جنگ میں شرکت کی،جب بھی کوئی ملک پریشر میں آکر کسی کی جنگ میں شرکت کریں گے تو نقصان ہی ہوگا۔

وزیراعظم نے مزید کہا کہ وقت آگیا ہے ہم نے اپنے ملک کو مضبوط کرنا ہے اور اپنے پیروں پر کھڑا ہونا ہے، جو پوٹینشل پاکستان میں ہے شاید ہی دنیا میں کوئی ایسا ملک ہو جہاں اتنا پوٹینشل ہو۔