مفتی عبدالقوی کے چچا عبدالواحد کا کہنا ہے کہ آج سے مفتی قوی کو مفتی نہ کہا جائے، ہم مفتی قوی سے مفتی کا لفظ واپس لے رہے ہیں کیونکہ اس نے ہمارے خاندان کا بہت نقصان کیا ہے۔

تفصیلات کے مطابق مفتی عبدالقوی کے چچا عبدالواحد ندیم نے ملتان میں پریس کانفرنس کرتے ہوئے کہا ہے کہ ہمارا خاندان عزت والا ہے، ہمارے خاندان نے ہزاروں لوگوں کو تعلیم دی ہے، ہمارا خاندان مسلکی گروہ بندی سے ہٹ کر خدمت کرتا رہا ہے۔

عبدالواحد ندیم نے کہا کہ ہمارا خاندان غم میں ہے، مفتی قوی نے ہمارے خاندان کا بہت نقصان کیا ہے۔ اس وجہ سے ہم نے مفتی قوی سے موبائل لے لیے ہیں۔

مفتی عبدالقوی کے چچا کا مزید کہناتھا کہ مفتی قوی کا ذہنی علاج کروایا جا رہا ہے، ان سے مفتی کا اعزاز بھی واپس لے لیا ہے۔

انہوں نے کہا کہ عبدالقوی کو لوگوں نے استعمال کیا وہ سازش کو سمجھ نہ پائے، عبدالقوی سے معاملات کے بارے میں پوچھا تو نامناسب جواب ملا۔

پریس کانفرنس میں مفتی عبدالقوی کے ذاتی معالج حافظ عبدالکبیر کا کہناتھا کہ مفتی قوی کی سوچ ان کے کنٹرول سے نکل گئی ہے، پوری کوشس ہے کہ مفتی قوی کو عوامی اجتماعات سے دور رکھیں۔

حافظ عبدالکبیر کا کہنا تھا کہ مفتی قوی کو گھر میں آئسولیٹ کیا ہے، وہ شہرت کے چکر میں رہے ہیں۔

خیال رہے کہ حال ہی میں ٹک ٹاک گرل حریم شاہ نے رویت ہلال کمیٹی کے سابق رکن مفتی عبدالقوی کی ایک اور ویڈیو شیئر کی ہے۔

ویڈیو  میں دیکھا جاسکتا ہے کہ حریم شاہ مفتی قوی کے ساتھ کھڑی ہیں اور وہ میک اپ کراتے ہوئے ویڈیو بنوارہے ہیں۔

حریم شاہ بول نیوز کے پروگرام میں یہ کہہ چکی ہیں کہ مفتی قوی کی فحش گفتگو کی ریکارڈنگ بھی ان کے پاس موجود ہے۔