پاکستان شوگر ملز ایسوسی ایشن کی جانب سے وزیراعظم عمران خان سے مطالبہ کیا گیا ہے کہ چینی کی قیمتوں کم کی جائیں۔

تفصیلات کے مطابق شوگر ملز ایسوسی ایشن کی جانب سے وزیراعظم عمران خان کے نام خط لکھا گیا ہے جس میں ایسوسی ایشن نے وزیراعظم کے عزائم کی مکمل حمایت کی ہے۔

خط میں بتایا گیا ہے کہ چینی کے مناسب داموں فروخت کے لیے ایسوسی ایشن آپ کے عزائم کی مکمل حمایت کرتی ہے تاہم چینی کی بڑھتی قیمت سے متعلق چند حقائق آپ کے سامنے رکھنا چاہتے ہیں۔

خط کے متن میں لکھا گیا ہے کہ حکومتی احكمات کے مطابق اس سال کرشنگ عمومی تاریخ (30 نومبر) سے 15-20 روز قبل شروع کی گئی جس کے باعث گنے سے کی جانے والی ریکووری انتہائی کم رہی اور ملک تقریبا 3 لاکھ ٹن چینی سے محروم ہوا ہے۔

خط میں مزید کہا گیا ہے کہ حکومت کی جانب سے ہمیں یقین دہانی کرائی گئی تھی کہ گنے کی خرید و فروخت میں مڈل مین کو دخل اندازی کی اجازت قطعاً نہیں دی جائے گی اور کہا گیا تھا 200 روپے فی من گنے کی قیمت یقینی بنائی جائے گی۔

خط میں مزید واضح کیا گیا ہے کہ حکومت کی جانب سے یقین دہانی کرائی گئی تھی عوام کو چینی 75 روپے فی کلو کے مناسب ریٹ پر دستیاب ہو گی تاہم تمام صوبوں کے کین کمیشنرز مڈل مین کا کردار ختم کرانے میں مکمل ناکام رہے ہیں۔

شوگر ایسوسی ایشن کا خط میں بتایا گیا ہے کہ گنے کی فی من قیمت 270 سے 300 روپے تک پہنچ چکی ہے تاہم چینی کی قیمت ایک بار پھر 100 روپے کلو سے اوپر جانے کا خدشہ ہے۔

ایسوسی ایشن کی جانب سے خط میں گزارش کی گئی ہے کہ محترم وزیر اعظم، ہماری آپ سے درخواست ہے کہ شوگر ملز کو گنے کی حکومتی مقرر کرده قیمت پر فراہمی یقینی بنائیں تاکہ چینی کی قیمت نیچے لائی جا سکے۔