پاکستان مسلم لیگ ن کی نائب صدر مریم نواز کا کہناہے کہ آج پنجاب رو رو کر نواز شریف کو یاد کرتا ہے، عمران کہتا ہے کہ عوام بھوکی مر رہی ہے تو میں کیاکروں۔

ڈسکہ میں مسلم لیگ ن کے احتجاجی جلسے سے مریم نواز نے خطاب کرتے ہوئے کہا کہ عمران کہتا ہے کہ عوام بھوکی مر رہی ہے تو میں کیاکروں، کوئی شرم ہوتی ہے کوئی حیا ہوتی ہے۔

مریم نواز کا کہناتھا کہ تحریک انصاف حکومت نے میٹرو بس نہیں بنائی بلکہ سڑکوں کے بیچ کھڈے بنادیے، ایک میٹرو 6 سال میں بنائی جہاں بسیں چلتی کم  ہیں۔

انہوں نے کہا کہ عمران خان اکیلا نہیں اس کے آگے آٹا چور پیچھے بجلی چور جبکہ بائیں گیس چور اور نیچے اے ٹی ایم ہیں۔

 مریم نواز کا کہناتھا کہ جس کے پاس کٹہ تھا وہ مرغیوں پر آگیا جس کے پاس مرغیاں تھی وہ انڈوں پر آگیا، پچاس لاکھ گھر اور نوکریاں تو دور کسی کو مرغی یا کٹا ملا۔

مریم نواز کا جلسے سے خطاب کرتے ہوئے کہا کہ 19 فروری کو آپ نے شیر پر مہر لگانی ہے، یہ الیکشن نہیں ہے، ایک جنگ ہے، یہ جنگ نواز شریف نے ووٹ چوروں کے خلاف شروع کررکھی ہے۔

انہوں نے کہا کہ نواز شریف نے 70سال کی عمر میں یہ جنگ شروع کی، 4 سال پہلے گوجرانوالہ جلسے میں نواز شریف نے کہا ہماری جنگ عمران خان کے ساتھ نہیں ان کے بڑوں کے ساتھ ہے۔

مریم نواز نے کہا کہ تاریخ میں پہلی مرتبہ پنجاب کھڑا ہوگیا ہے، پنجاب والو آج سچ سچ بتادو جب سے حکومت ایک ووٹ چور کے ہاتھ میں دی گئی پنجاب لاوارث نہیں ہوگیا؟

مسلم لیگ ن کی نائب صدر کا مزید کہناتھا کہ نواز شریف عوام سے پوچھا کرتا تھا کہ مہنگی چیز تو نہیں مل رہی۔

مریم نواز نے کہا کہ سیالکوٹ میں جب عمران خان جب ووٹ مانگنے آئے تو کہنا عوام کی چیزیں چوری کرکے کیا لینے آئے ہو، آج چینی کی قیمت کیا ہے؟ نواز شریف کے دور میں کیا کلو تھی؟ ہاتھ اٹھا کر بتاؤ بجلی آتی ہے یا بجلی کے لمبے لمبے بل آتے ہیں؟ گیس آتی ہے یا گیس کے لمبے لمبے بل آتے ہیں۔

انہوں نے کہا کہ عمران خان نے آپ سے ایک کروڑ نوکریوں کا کہا تھا کتنوں کو نوکریاں ملی، جس کو نوکری ملی یہاں آؤ اس کے گلے میں ہار ڈالو۔

جلسے کے شرکا سے خطاب کرتے ہوئے مریم نواز نے مزید کہا کہ کیا نواز شریف اور شہباز شریف کے بغیر پنجاب لاوارث نہیں ہوگیا، مجھے اس بات کا غصہ کہ پورے پاکستان کو انہوں نے ایک نوکری نہیں دی۔