سابق امریکی صدر باراک اوباما اور ان کی اہلیہ مشیل اوباما کے پروڈکشن ہاؤس نے پاکستانی ناول نگار محسن حامد کی تصنیف ’ ایگزیٹ ویسٹ ‘ پر فلم بنانے کا اعلان کردیا ہے۔

خبر رساں ایجنسی کے مطابق اوباما کے پروڈکشن ہاؤس’ ہائیر گراؤنڈ پروڈکشن‘ نے نیٹ فلیکس کے لیے چھ نئے پراجیکٹس کا بھی اعلان کیا ہے۔

ایگزیٹ ویسٹ نامی کتاب میں ایک ایسے نوجوان جوڑے کی کہانی بیان کی گئی ہے جو عالمی پناہ گزینوں کے بحران کے بیچ دوسرے مقامات اور زمین تک پہنچنے کے لئے جادوئی دروازے تلاش کرتے ہیں۔

فلم میں مرکزی کردار پاکستانی نژاد برطانوی اداکار رض احمد ادا کریں گے۔

ناول’ایگزٹ ویسٹ‘ 2017 میں شائع ہوا، امریکا کے سابق صدر براک اوباما اسے اپنا پسندیدہ ناول قرار دے چکے ہیں۔

آن لائن اسٹیمنگ ویب نیٹ فلکس کا کہنا ہے کہ سابق امریکی صدر کے پروڈکشن ہاوس کی جانب سے یہ فلمیں اگلے چند سالوں میں ریلیز کی جائیں گی لیکن انہوں نے فلم ریلیز کرنے کی حتمی تاریخیں نہیں بتائی۔

خیال رہے کہ اوباما نے 2018 میں نیٹ فلکس کے ساتھ ملٹیئر پروڈکشن ڈیل پر دستخط کیے تھے۔

اس حوالے سے مشیل اوباما کا کہنا تھا کہ کہانی بیان کرنے کی طاقت نے ہمیشہ ہمیں متاثر کیا ہے۔ یہی وہ طاقت ہے جس کے ذریعے ہم سوچ کو مختلف انداز دیتے ہوئے اپنے اردگرد موجود لوگوں پر مثبت اثر ڈال سکتے ہیں۔

انہوں نےمزیدکہا کہ نیٹ فلکس ہی وہ بہترین پلیٹ فارم ہے جس کے ذریعے ہم اپنے آئیڈیاز کو بہتر طور پر لوگوں تک پہنچا سکتے ہیں۔