وزیرداخلہ کا کہنا ہے کہ کشمیر کی جدوجہد آزادی کو ہم سلام پیش کرتے ہیں۔

تفصیلات کے مطابق راولپنڈی میں یکجہتی کشمیر ریلی سے خطاب کرتے ہوئے وزیرداخلہ شیخ رشید احمد کا کہنا تھا کہ میں کشمیریوں کو یہ کہنا چاہتا ہوں کہ راولپنڈی غیرت مندوں کا شہر ہے اور کشمیر کی آزادی کے لیے ہمہ وقت تیار ہے۔

وزیر داخلہ نے دعویٰ کیا کہ اگر مریم بی بی کو باہر جانے کی اجازت دے دی جائے تو ابھی ساری پاکستان ڈیمو کریٹک موومنٹ(پی ڈی ایم) ختم ہو سکتی ہے،  ایک ہی مطالبہ ہے کہ ہمیں بھی جانے دو۔

شیخ رشید احمد نے کہا کہ مسلم لیگ(ن) گھیرے میں ہے، آج شہباز شریف کا کیس سنجیدہ ہے، یہ جیل جاتے ہیں تو ان کی صحت خراب ہو جاتی ہے، جیل ان کو راس نہیں آتی، یہ اپوزیشن میں ہوں تو ان کا دل کرتا ہے کہ باہر جائیں۔

انہوں نے کہا کہ فضل الرحمٰن صاحب آپ کن بچوں کے گھیرے میں آ گئے ہیں، آپ اچھے بھلے سمجھدار آدمی ہیں، آپ دیکھیں آصف زرداری کتنا بڑا گرو نکلا ہے۔

ان کاکہنا تھا کہ اگر آصف زرداری کے کیس کراچی جائیں گے تو کون ان کے خلاف شہادت دے گا کیونکہ جب یہ جیل میں تھے تو سارے پاکستان کے بدمعاشوں اور جیلوں کا نیٹ ورک اس نے بنایا ہوا تھا۔

وزیر داخلہ نے اپوزیشن جماعتوں کو مخاطب کرتے ہوئے کہاکہ تین سال گزرنے والے ہیں، ایک سال کے بعد الیکشن مہم شروع ہو جائے گی، کیا تم اس ملک میں سیاسی انتشار پھیلانا چاہتے ہو۔

انہوں نے کہا کہ میری بحیثیت وزیر داخلہ پوری کوشش ہو گی کہ ہم آپ کے راستے میں کوئی رکاوٹیں کھڑی نہ کریں لیکن اگر آپ نے قانون کو ہاتھ میں لیا تو یاد رکھنا آپ سے وہ سلوک کروں گا کہ تاریخ یاد رکھے گی۔

ان کا کہنا تھا کہ ہمیں یوٹرن کا طعنہ دینے والو تم تو اباؤٹ ٹرن لیتے ہوں، اب یہ 26مارچ کو لانگ مارچ کر رہے ہیں، آ جائیں۔