دنیا کے دوسرے بلند ترین پہاڑ کے ٹو کو سر کرنے کی کوشش کے دوران لاپتہ ہونے والے پاکستان کے عالمی شہرت یافتہ کوہ پیما علی سد پارہ اور ان کی ٹیم کی تلاش میں آج پھر سے سرچ آپریشن شروع کر دیا گیا ہے۔

ذرائع کے مطابق سدپارہ اور ان کی ٹیم کی تلاش کےلیے ریسیکو آپریشن جاری ہے، آرمی کے دو ہیلی کاپٹر ریسکیو ٹیم کےساتھ بلترو سیکٹر پہنچ گئے ہیں۔

 وزیراعلیٰ گلگت بلتستان کا کہنا ہے کہ قومی ہیروعلی سدپارہ اور دیگر کی بحفاظت واپسی کے لیے قوم سے دعا کی اپیل ہے۔

 وزیراعلی گلگت بلتستان نے کہاکہ آرمی ایوی ایشن کے تعاون سے سرچ اینڈ ریسکیو آپریشن آج بھی جاری رہے گا۔

انھوں نے مزید کہاکہ  سرچ آپریشن میں آرمی ایوی ایشن کا کردار انتہائی قابل تحسین ہے۔

گزشتہ روز آرمی ہیلی کاپٹرز کے ذریعے 7 ہزار میٹر کی بلندی تک لاپتہ کوہ پیماؤں کو تلاش کیا گیا لیکن خراب موسم اور تیز ہواؤں کے باعث سرچ آپریشن میں مشکلات پیش آئیں۔

علی سد پارہ اور ان کی ٹیم انتہائی بلندی پر پہنچ گئے تھے، تاہم گزشتہ روز سے ان کا اپنے اہل خانہ، بیس کیمپ اور ٹیم سے رابطہ منقطع ہوگیا تھا، ان کی ٹیم میں شامل غیر ملکی کوہ پیماؤں کا تعلق آئس لینڈ اور چلی سے ہے، جب کہ علی سدپارہ کے بیٹے ساجد سد پارہ بحفاظت کیمپ ون میں پہنچ گئے۔

دوسری جانب وزیراعظم عمران خان اور آرمی چیف جنرل قمر جاوید باجوہ نے کوہ پیماؤں کی باحفاظت واپسی کےلیے تمام وسائل بروئے کار لانے کی ہدایت کی ہے۔

ذرائع کے مطابق وزیر خارجہ شاہ محمود قریشی اور آئس لینڈ کے وزیرخارجہ کے درمیان ٹیلی فونک رابطہ ہوا ہے ۔

وزیر خارجہ نے کہا کہ لاپتہ کوہ پیماوَں کی تلاش کیلئے پاکستان ہر ممکن کوشش کرے گا ۔