خیبر پختونخوا میں شادی کی تقریبات پر پابندی عائد،  پشاور میں کورونا سے بچاؤ کے لیے آج سے ماسک پہننا لازمی قرار دے دیا گیا۔

تفصیلات کے مطابق خیبرپختونخوا میں بھی کورونا کی تیسری لہر شدت اختیار کر گئی۔ پختونخوا میں آج سے شادی تقریبات پر پابندی اور ہفتے میں دو دن مارکیٹوں کے ساتھ ٹرانسپورٹ بھی بند رہے گی۔

پولیس ذرائع کے مطابق کورونا سے بچاؤکےلئے ماسک نہ پہننے پر قانونی کارروائی عمل میں لائی جائے گی۔

سی سی پی او پشاورعباس احسن کا کہنا ہےکہ ماسک پہننا لازمی قرار دے دیا گیا ہے،  ماسک نہ پہننے والوں کو مرحلہ وار گرفتار کیا جائیگا۔

واضح رہےکہ  وزیراعلیٰ خیبر پختونخوا محمود خان کی زیر صدارت صوبائی ٹاسک فورس برائے انسداد کورونا کا اجلاس ہوا جس میں کورونا کے مثبت کیسز کی شرح میں آئے روز اضافے پر تشویش کا اظہار کیا گیا اور وباء کے پھیلاؤ کو روکنے کے لئے متعدد اہم فیصلے کیے گئے۔

معاون خصوصی کامران بنگش نے بتایا کہ کل سے شادی ہالز کے اندر شادی بیاہ کی تقریبات پر پابندی عائد ہوگی، اس وقت صوبے کے کل 16 اضلاع میں کورونا کے مثبت کیسز کی شرح بہت زیادہ ہے جن میں تعلیمی اداروں کو بند کرنے کا فیصلہ کیا گیا ہے، کسی بھی ضلع میں کورونا کے مثبت کیسز پانچ فیصد ہونے کی صورت میں وہاں تعلیمی اداروں کو بند کیا جائے گا، سول سکریٹریٹ میں ملاقاتیوں پر پابندی لگانے کا فیصلہ کیا گیا ہے۔

کامران بنگش نے کہا کہ  صوبائی وزراء کو اختیار ہوگا کہ وہ حالات کے مطابق اپنے دفاتر میں عملے کو مزید کم کریں۔

 انہوں نے مزید کہاکہ پولیو مہم جاری رہے گی جس کے دوران ایس او پیز پر عملدرآمد کے لئے خصوصی میکنزم ترتیب دیا جائے گا، حالات مزید خراب ہونے کی صورت میں حکومت مزید سخت فیصلوں پر مجبور ہوگی۔