جماعت اسلامی کے مرکزی جنرل سیکریٹری لیاقت بلوچ نے کہا کہ عمران خان کے پاس نہ ٹیم ہے اورنہ ہی وژن۔

جماعت اسلامی کے مرکزی جنرل سیکریٹری لیاقت بلوچ نے پریس کانفرنس کرتے ہوئے کہا کہ عمران خان کی حکومت ہرمحاز پرنا کام ہے اور ریاست مدینہ کی بات کرکے لادینیت کی سرپرستی کی جا رہی ہے۔

لیاقت بلوچ نے کہا کہ نیب کو سیاسی مقاصد کے لیے استعمال کیا جا رہا ہے جبکہ سی پیک سست روی کا شکار ہے۔

 انہوں نے کہا کہ بلوچستان میں ہردورکے حکمران ٹولے نے اپنے مفادات حاصل کیے ہیں اور یہاں کسی کی جان و مال محفوظ نہیں ہے ، آج پورا ملک گرداب میں ہے۔

 انہوں نے یہ بھی کہا کہ کل کراچی میں فقید المثال عوامی اجتماع ہوگا جس میں جماعت اسلامی سینیٹ اور قومی اسمبلی اپوزیشن کا کردارادا کررہی ہے۔

لیاقت بلوچ  کا کہنا تھا کہ عمران خان نے سیاست میں بد تمیزی اورتکبرکو فروغ دیا ہے اورعمران خان کو اپنی ناکامیوں کا اعتراف کر لینا چاہیئے۔

 انہوں نے سرکاری ملازمین کی تنخواہوں میں اضافے کے احتجاج کی حمایت کرتے ہوئے کہا کہ مہنگائی کے خلاف بڑے احتجاج کے لیے عوام کو منظم کررہے ہیں۔

جنرل سیکریٹری لیاقت بلوچ  نے کہا کہ آئی ایم ایف کے حکم پرلگائے گئے ٹیکسز سے عوام مہنگائی کی چکی میں پس رہی ہے جبکہ بلدیاتی حکومتوں کی بحالی پی ٹی آئی کے منہ پر طمانچہ ہے۔

سیکریٹری لیاقت بلوچ نے کہا کہ کشمیرپر بھارتی مظالم بڑھتے جا رہے ہیں اوراحتساب کا نعرہ بے معنی ہوگیا ہے۔

انہوں نے کہا کہ بی اے پی سرکارملکی اوربلوچستان کی تاریخ میں شرمناک کردارادا کررہی ہے جبکہ اندرون سندھ کی حالت ناقابل بیان ہے ، کراچی کی عوام سڑکوں پر ہے۔

لیاقت بلوچ نے کہا کہ 1973 سے انتخابات 5 سال کے لیے ہوتے ہیں اور اب انتخابات 4 سال بعد ہونے چاہیئں۔

جماعت اسلامی کے مرکزی جنرل سیکریٹری لیاقت بلوچ  نے مزید کہا کہ چیئرمین سینیٹ کے انتخاب کے لیے جو طریقہ استعمال ہوا وہی اپوزیشن لیڈر کے انتخاب میں ہوا ہے اور پورا ملک بلوچستان کے ساتھ ہے۔