وزیراعلیٰ پنجاب کے سیاسی رابطوں میں تیزی آگئی، عثمان بزدار آج اسلام آباد میں ارکان قومی اسمبلی سے ملاقات کریں گے۔

تفصیلات کے مطابق وزیراعلیٰ پنجاب عثمان بزدار اراکین قومی اسمبلی سے حلقوں کے مسائل کے حل کیلئے مشاورت کریں گے۔

وزیراعلیٰ پنجاب نے گزشتہ رات پنجاب ہاؤس اسلام آباد میں اراکین قومی اسمبلی کو عشائیہ دیا، جس میں گورنر پنجاب ، وفاقی وزراء کے علاوہ اراکین قومی اسمبلی کی بڑی تعداد نے شرکت کی۔

ذرائع کے مطابق اس موقع پرعثمان بزدار کا کہنا تھا کہ ہم سب وزیراعظم عمران خان کی قیادت میں ایک ہیں، پیسے کی بدولت ایک سیٹ جیت کر واویلا مچانے والوں کی سیاسی، اخلاقی اور جمہوری ساکھ ختم ہوچکی ہے، پی ڈی ایم ملکی مفادات کے مخالف سمت چل رہی ہے، وزیراعظم اور شفاف پاکستان ایک دوسرے کے ساتھ جڑے ہوئے ہیں، عمران خان نے قوم کو کرپشن کے خلاف اکٹھا کیا ہے۔

وزیراعلیٰ پنجاب نے کہا کہ ڈھائی برس میں ہماری حکومت کے دامن پر کرپشن کا کوئی داغ نہیں ہے، سابق ادوار میں ہر روز کرپشن کا نیا اسکینڈل سامنے آتا تھا، قوم اور منتخب نمائندے کپتان کے ساتھ ہیں اور رہیں گے۔

انھوں نے مزید کہا کہ انشاء اللہ اراکین قومی اسمبلی کل وزیراعظم عمران خان پر بھرپور اعتماد کا اظہار کریں گے۔