وزیراعلیٰ پنجاب عثمان بزدار کا کہنا ہےکہ اپوزیشن کا منفی بیانیہ عوام نے مسترد کر دیا، پی ڈی ایم مکافاتِ عمل کا شکار ہو کر ٹوٹ چکی، پی ڈی ایم بے سمت دوڑنے والا سیاسی ہجوم ہے۔

تفصیلات کے مطابق وزیراعلیٰ پنجاب عثمان بزدار سے مسلم لیگ (ن) کے رکن صوبائی اسمبلی اشرف انصاری نے ملاقات کی، ملاقات میں یونس انصاری اور طاہر بشیر چیمہ بھی موجود تھے۔

ذرائع کے مطابق اشرف انصاری اور یونس انصاری نے گوجرانوالہ کے لئے اربوں روپے کا ترقیاتی پیکیج دینے پر وزیراعلیٰ پنجاب کو خراج تحسین پیش کیا۔

اس موقع پر اشرف انصاری کا کہنا تھا کہ یونیورسٹی کے قیام کا اعلان کرکے گوجرانوالہ کے لوگوں کے دل جیت لئے، آپ کی قیادت میں گوجرانوالہ ترقی کرے گا اور عوام کے مسائل حل ہوں گے، شہر کی صفائی کے لئے جی ڈبلیو ایم سی کو 106 گاڑیاں فراہم کرنا قابلِ تحسین ہے۔

یونس انصاری نے کہا کہ ماضی میں گوجرانوالہ کی صفائی اور دیگر بنیادی مسائل کو بری طرح نظر انداز کیا گیا، گوجرانوالہ کو لاہور سیالکوٹ موٹروے سے منسلک کرنے سے عوام کا دیرینہ مسئلہ حل ہوگا، ہمیں آپ کی قیادت پر بھرپور اعتماد ہے۔

عثمان بزدار نے کہاکہ صوبہ کے تمام شہروں کی یکساں ترقی ہمارا عزم ہے، خدمت کے جذبے سے کام کر رہے ہیں، عوام کے مسائل حل کرنے کے لئے ہر وقت دروازے کھلے رکھتے ہیں، گوجرانوالہ کے ترقیاتی منصوبوں کی خود مانیٹرنگ کروں گا، گوجرانوالہ کے ترقیاتی منصوبوں کو بروقت پایہ تکمیل تک پہنچایا جائے گا، گوجرانوالہ میرا اپنا شہر ہے، مسائل پر پوری نظر ہے۔