پی ڈی ایم کو ایک پیج پر رکھنے کے مشن پر گامزن مولانا فضل الرحمان کی جاتی امرا میں مریم نواز اور حمزہ شہباز سے ملاقات جاری ہے.

تفصیلات کے مطابق اس ملاقات میں استعفوں اور لانگ مارچ کے حوالے سے آئندہ کی حکمت عملی پر مشاورت ہوگی۔

پی ڈی ایم کے سربراہ مولانا فضل الرحمان جاتی امرا پہنچ گئے جہاں مسلم لیگ ن کی نائب صدر مریم نواز اور مرکزی رہنما حمزہ شہباز سے ملاقات کر رہے ہیں، ملاقات میں پی ڈی ایم کے مستقبل کے حوالے سے مشاورت کی جائے گی۔

مولانا فضل الرحمان مریم نواز سے موجودہ ملکی سیاسی صورتحال،عید کے بعد لانگ مارچ کے حوالے سے بھی تبادلہ خیال کریں گے۔

مولانا اور مریم کی ملاقات میں ن لیگ کے دیگر سینیئر رہنما بھی شریک ہیں۔

اس سے قبل  میڈیا سے گفتگو کرتے ہوئے مولانا فضل الرحمان کا کہنا تھا کہ بامقصد لانگ مارچ ہونا چاہیے،پارلیمنٹ سے استعفے دینا پی ڈی ایم کے اعلامیے کا حصہ ہے، پیپلز پارٹی کو اتحاد میں شامل رکھنا چاہتے ہیں۔

پی ڈی ایم سربراہ نے مزید کہا کہ عوام کی نمائندہ جماعت لانا ہوگی، حکومت نے اعتراف کر لیا ہے ہمیں اپنا گھر ٹھیک کرنا چاہیے، گھر تب ہی ٹھیک ہوگا جب ملک کو آئین کے مطابق چلایا جائے اور انتخابات آئین کے تحت کروائے جائیں گے۔

انہوں نے کہا کہ پی پی نے وقت مانگا ہے، کسی ایک پارٹی کو قربان نہیں کرسکتے۔