وفاقی وزیر برائے منصوبہ بندی و ترقی اسد عمر کا کہنا ہے کہ صادق سنجرانی کو ایک دفعہ پھر چیئرمین سینیٹ منتخب ہونے پر مبارکباد دیتے ہیں۔

تفصیلات کے مطابق اسدعمر نے سماجی رابطے کی ویب سائٹ ٹویٹر پر ٹویٹ کرتے ہوئے صادق سنجرانی کو ایوان بالا کا چیئرمین منتخب ہونے پر مبارکباد دیتے ہوئے کہا کہ انہوں نے پہلے بھی سینیٹ کو احسن طریقے سے چلایا تھا، امید ہے آئندہ بھی ایسے ہی کریں گے۔

صادق سنجرانی کو ایک دفعہ پھر سینیٹ چئیرمین منتخب ہونے پر مبارکباد. انہوں نے پہلے بھی سینیٹ کو احسن طریقے سے چلایا تھا اور امید ہے آئندہ بھی ایسے ہی کریں گے. بلوچستان زندہ باد، پاکستان پائندہ باد

— Asad Umar (@Asad_Umar) March 12, 2021

 اسد عمر ٹوئٹ نے اپنے پیغام میں  بلوچستان زندہ باد اور پاکستان پائندہ باد کا نعرہ بھی لگایا۔

خیال رہے کہ حکومتی امیدوار صادق سنجرانی دوبارہ چیئرمین سینیٹ منتخب ہوگئے۔

سابق چیئرمین سینیٹ و حکومتی امیدوار صادق سنجرانی مسلسل دوسری بار چیئرمین سینیٹ منتخب ہوئے ہیں۔

چیئرمین سینیٹ کے عہدے کے لیے حکومتی اتحاد کی جانب سے صادق سنجرانی کا مقابلہ پی ڈی ایم کے مشترکہ امیدوار یوسف رضا گیلانی کے ساتھ ہوا۔

ووٹنگ کے دوران سینیٹ کے 100 میں سے 98 ارکان نے اپنا حق رائے دہی استعمال کیا۔ صادق سنجرانی نے 48جبکہ یوسف رضاگیلانی نے 42 ووٹ حاصل کیے۔

پی ڈی ایم کے امید وار یوسف رضا گیلانی کے سات ووٹ  جبکہ  صادق سنجرانی کے ایک ووٹ پراعتراض ہوا۔

واضح رہے کہ  ڈپٹی چیئرمین سینیٹ کے لیے حکومت کی جانب سے مرزا محمد آفریدی اور پی ڈی ایم کی جانب سے مولانا غفور حیدری امیدوار ہیں۔