وزیر اعظم عمران خان کا کہنا ہے کہ ماضی کی حکومتوں نے ملک میں برآمدات میں اضافے کے لیے کوئی اقدامات نہیں کیے۔

تفصیلات کے مطابق وزیر اعظم عمران خان نے روشن ڈیجیٹل اکاؤنٹ کی تقریب سے خطاب کر تے ہوئے اوورسیزپاکستانیوں کیلئے دو نئے  پروگرام “روشن اپنی کار” اور”روشن سماجی خدمت” کی کامیابی کے لیے نیک تمناؤں کا اظہار کیا۔

وزیراعظم نے کہاکہ اوورسیز پاکستانی ہمارا بہت بڑا اثاثہ ہیں ، روشن ڈیجیٹل اکاؤنٹ میں ایک بلین ڈالر کی وصولی بڑی کامیابی ہے۔

عمران خان نے کہاکہ 90 لاکھ پاکستانی ملک سے باہر رہتے ہیں جس کا ایک حصہ بھی ہم روشن ڈیجیٹل اکاؤنٹ کی طرف لے آئے تو یہ اعداد و شمار بہت بدل سکتے ہیں۔

انہوں نے کہا کہ پاکستان کا مسئلہ یہ رہا ہے کہ کسی نے برآمدات کو بڑھانے کی کوشش نہیں کی جو پاکستان کی ترقی میں رکاوٹ رہی ہے۔

وزیراعظم عمران خان نے کہاکہ  ہماری شرح نمو اس لئے رکتی تھی کیونکہ برآمدات میں کمی کی وجہ سے ڈالروں کی کمی ہوتی تھی اور یہ بہت بڑا المیہ رہا ہے کہ کسی نے طویل المدتی منصوبہ بندی نہیں کی۔

عمران خان نے کہاکہ  جب تک ہم اپنی برآمدات نہیں بڑھاتے ہمارے پاس اوورسیز پاکستانیوں کی ترسیلات زر کا آپشن ہے۔

انہوں نے کہا کہ اسٹیٹ بینک اور وزارت خزانہ میں ہمیں اس پر غور کرنا چاہیے کہ برآمدات کے بڑھنے تک اس خلا کو پر کیسے کیا جاسکتا ہے۔

واضح رہےکہ حال ہی میں وزیراعظم نے سمندر پار پاکستانیوں کا شکریہ ادا کرتے ہوئے سوشل میڈیا پیغام میں کہا تھا کہ الحمد اللّہ! روشن ڈیجیٹل اکاؤنٹ کے ذریعے فنڈز وصولی ایک ارب ڈالر سے تجاوز کرگئی ہے۔

Advertisement

Alhamdulillah, funds received through #RoshanDigitalAccount have crossed $1bn. I would like to thank our overseas Pakistanis for their overwhelming response; also appreciate the efforts of SBP & banks for achieving this significant milestone in such a short period. #1billionRDA pic.twitter.com/YNksGLXzpM

— Imran Khan (@ImranKhanPTI) April 24, 2021