پاکستان ٹیلی ویژن کی کامیاب میزبان میں شمار کی جانے والی فرح سعدیہ کا ماننا ہے کہ ایدھی نوبل انعام کے اصل حقدار تھے۔

بھارت میں کورونا کی خطرناک صورتحال سے نمٹنے کیلئے ایدھی فاؤنڈیشن کی جانب سے مدد کی پیشکش نے معروف شخصیات کو بھی خوشگوار حیرت میں مبتلا کردیا ہے۔

ایدھی صاحب کہا کرتے تھے میرا مذہب انسانیت ہے، اور اس بات پر مذہبی حلقے اُن پر تنقید کرتے تھے، جبکہ میرے ساتھ انٹرویو میں اُنھوں نے واضح بیان کیا تھا کہ وہ صرف انسان بچاتے ہیں اُنہیں اُس کے مذہب صوبے ، زبان سے کوئ فرق نہیں پڑتا ، وہ نوبل انعام کے حقدار تھے اللہ مغفرت فرماۓ https://t.co/HqwA0WeChG

— Farah Saadia (@FarahSaadya) April 23, 2021

فرح سعدیہ نے ایدھی فاؤنڈیشن کی جانب سے بھارت کی مدد کیلئے مودی کو لکھے گئے خط کو شیئر کیا۔

فرح سعدیہ نے کہا کہ ایدھی صاحب کہا کرتے تھے میرا مذہب انسانیت ہے، اور اس بات پر مذہبی حلقے اُن پر تنقید کرتے تھے۔

اداکارہ نے ایدھی صاحب کے انٹرویو کو یاد کرتے ہوئے کہا کہ ’ میرے ساتھ انٹرویو میں اُنہوں نے واضح بیان کیا تھا کہ وہ صرف انسان بچاتے ہیں اُنہیں اُس کے مذہب صوبے ، زبان سے کوئی فرق نہیں پڑتا۔‘

میزبان فرح نے کہا کہ ’وہ نوبل انعام کے حقدار تھے اللہ مغفرت فرماۓ‘

گزشتہ روز پاکستان کی سماجی خدمت گار تنظیم ایدھی فاونڈیشن کے سربراہ فیصل ایدھی نے پڑوسی ملک بھارت میں کورونا وائرس کے پھیلاؤ اور لاکھوں افراد کے متاثر ہونے پر تشویش کا اظہار کیا ہے۔

اس حوالے سے ایک میڈیا بیان میں انہوں نے کہا ہے کہ مصیبت کی گھڑی میں ایدھی فاؤنڈیشن اور اس کے رضا کار اپنے پڑوسی ملک بھارت کی عوام کے ساتھ کھڑے ہیں۔

انہوں نے ایدھی فاؤنڈیشن کی جانب سے پچاس ایمبولینسز اور رضاکاروں کی ٹیم بھارت بھیجنے کی پیشکش کی ہے تاکہ بھارت کے عوام کی اس مشکل وقت میں مدد کی جاسکے۔

انہوں نے کہا کہ جیسے ہی انہیں سرکاری طور پر اجازت ملے گی وہ اپنی خصوصی رضاکار ٹیم کے ساتھ بھارت روانہ ہوجائیں گے۔