وزیرِ اعظم عمران خان نے کہا ہے کہ آئندہ بجٹ میں ترقیاتی منصوبوں پر خصوصی توجہ دی جائے۔

تفصیلات کے مطابق وزیرِ اعظم عمران خان کی زیر صدارت آئندہ بجٹ ور ملکی معیشت کے حوالے سے اعلیٰ سطح کا اجلاس ہوا جس میں ملکی معیشت، مہنگائی کو روکنے کیلئے بنائی گئی جامع حکمتِ عملی سے وزیرِ اعظم عمران خان کو آگاہ کیا گیا۔

اس موقع پر وزیراعظم کو بریفنگ میں بتایا گیا کہ آئندہ مالی سال کا بجٹ ترقیاتی بجٹ ہوگا، بجٹ میں تمام تر توجہ شرح نمو میں اضافے پر ہوگی۔

اجلاس کو بریفنگ دیتے ہوئے مزید کہا گیا کہ آئندہ مالی سال میں ترقیاتی کاموں کو مزید تیز تر کرکے نئے منصوبوں کا اجراء کیا جائے گا جبکہ روزگار کے بے شمار مواقع پیدا ہونگے جی ڈی پی کا حجم بڑھے گا اور محصولات میں اضافہ ہوگا۔

اجلاس کی صدارت کرتے ہوئے عمران خان نے کہا کہ آئندہ بجٹ میں ترقیاتی منصوبوں پر خصوصی توجہ دی جائے، جاری منصوبوں کی تکمیل کو یقینی بنانے کے ساتھ ساتھ عوام کی ضروریات کو مدنظر رکھتے ہوئے ترقیاتی منصوبوں کو حتمی شکل دی جائے۔

وزیرِ اعظم عمران خان نے مزید کہا کہ ترقیاتی منصوبوں کے ساتھ ساتھ مہنگائی کی شرح کو روکنے پر بھی خصوصی توجہ دی جائے۔

اجلاس میں سپیکر قومی اسمبلی اسد قیصر، وفاقی وزراء شاہ محمود قریشی، پرویز خٹک، شفقت محمود، اسد عمر،فواد چوہدری، گورنر خیبر پختونخوا شاہ فرمان، وزیرِ اعلیٰ خیبر پختونخوا محمود خان ، صوبائی وزراء ہاشم جواں بخت، تیمور سلیم جھگڑا اور متعلقہ اعلیٰ حکام نے شرکت کی۔