ایم کیو ایم تنظیم بحالی کمیٹی کے سربراہ فاروق ستار نے کہا ہے کہ شہر قائد کو 12 سال میں ایک قطرہ پانی کا نہ دینے والی سندھ حکومت معاشی دہشت گرد ہے۔

تفصیلات کے مطابق کراچی تاجر اتحاد کے رہنما عتیق میر و دیگر کے ہمراہ پریس کانفرنس میں سینئر سیاستدان اور ایم کیو ایم تنظیم بحالی کمیٹی کے سربراہ فاروق ستار نے سندھ حکومت کو معاشی دہشت گرد قرار دے دیا۔

سینئر سیاستدان نے کہا کہ 12 سالوں میں سندھ کے وڈیروں نے جیسے پورے سندھ کو غلام بنایا ہوا ہے، سندھ کے شہری علاقوں کراچی اور حیدرآباد پر بھی اپنا قبضہ کرنا چاہتے ہے۔

ڈاکٹر فاروق ستار نے یہ بھی کہا کہ کراچی سب کی مشترکہ ملکیت ہے،کراچی میں بدامنی پھیلانے کی سازش ہو رہی ہے۔

ایم کیو ایم تنظیم بحالی کمیٹی کے سربراہ نے کہا کہ میں دعوے سے کہتا ہوں کسی ایک اسسٹنٹ کمشنر ، ایس ایچ او، ڈی ایس پی اور ایس ایس پی کا ڈومیسائل کراچی کا نہیں ہے۔

سینئر سیاستدان کا کہنا تھا کہ سندھ کے وڈیروں نے کراچی کو اپنی کالونی بنادیا ہے۔ دہرے معیار کے ذمہ دار آئی جی، ایس ایس پی، ڈی ایس پی، ایس ایچ او اور اسسٹنٹ کمشنر ہیں لیکن دہرا معیار اب نہیں چلے گا۔

ڈاکٹر فاروق ستار کا یہ بھی کہنا تھا کہ صوبائی حکومت کراچی سے ووٹ نہ ملنے کا بدلہ لے رہی ہے۔ سندھ حکومت اور پولیس کا کام کورونا ضوابط پر عمل درآمد کروانا ہے، کاروبار بند کروانا نہیں ہے۔

سینئر سیاستدان نے کہا کہ لاک ڈاؤن کی آڑ میں اوقات کی بندش لگا کر کراچی کے کاروبار اور تجارت کو نقصان پہنچایا جارہا ہے۔

ڈاکٹر فاروق ستار نے یہ بھی کہا کہ5 بجے سے پولیس اور انتظامیہ کے لوگ مارکیٹوں کے باہر سائرن بجانا شروع کردیتے ہیں جبکہ کراچی میں پولیس والے موت کے فرشتوں کی طرح ہمارا معاشی قتل کر رہے ہیں۔

سینئر سیاستدان اور ایم کیو ایم تنظیم بحالی کمیٹی کے سربراہ فاروق ستار نے مزید کہا کہ 5 بجے سے ہی کاروبار بند کروادیا جاتا ہے۔ تجارتی مراکز کھلنے سے اسپتالوں پر بوجھ نہیں بڑھے گا، ہم اپنے کارکنان سے تجارتی مراکز میں ایس او پیز پر عملدرآمد کرائیں گے۔