پاکستان مسلم لیگ(ن) کی ترجمان مریم اورنگزیب نے کہا ہے کہ عمران صاحب یوروپین  پارلیمنٹ کی قرارداد آپکی سفارتکاری کی ناکامی ہے۔

تفصیلات کے مطابق پاکستان مسلم لیگ(ن) کی ترجمان مریم اورنگزیب نے وزیراعظم عمران خان کے سفیروں سے خطاب کو ناکامی چھپانے کا نیا ڈرامہ کہہ دیا  ہے۔

مریم اورنگزیب نے کہا کہ جی ایس پی پلس کی پاکستان کے لئے رعایت 2014 میں نواز شریف کی خارجہ اور سفارتی پالیسی کی کامیابی ہے اور اس کے خلاف قرارداد عمران صاحب کی ناکامی ہے۔

مریم اورنگزیب کا کہنا تھا کہ عمران صاحب پاکستان کے سفیروں سے ویڈیو لنک پہ خطاب اور خالی بازاروں میں ماڈلنگ کرنے سے آپ کی ناکامی چھُپ نہیں سکتی۔

انہوں نے کہا کہ عمران صاحب خالی بازاروں میں ماڈلنگ کرنے سے نہ مہنگائی ختم ہو گی اور نہ  سفیروں کے ساتھ ویڈیو لنک پہ بات کرنے سے آپ کی خارجہ پالیسی کی سمت درست ہو گی۔

مریم اورنگزیب نے یہ بھی کہا کہ یورپی یونین کے 27 ممالک نے آپ کے خلاف قرارداد منظور کی ہے، سفیروں سے ویڈیو لنک کر کے کس کو بیوقوف بنا رہے ہیں ۔

انہوں نے کہا کہ یورپی پارلیمان کے 700 میں سے 686 ارکان نے پاکستان کے جی ایس پی پلس کے ریویو کے حق میں ووٹ دیئے ہیں، کس کو بیوقوف بنا رہے ہیں۔

مریم اورنگزیب نے حکومت سے سوال کرتے ہوئے کہا کہ آٹا چینی چوری کی منظوری آپ دیں لیکن کٹہرے میں دوسرے کھڑے ہوں؟

انہوں نے تنقید کرتے ہوئے کہا کہ عمران صاحب دوائی چوری کرنے والے کو پارٹی عہدہ آپ دیں اور سزا ملے غریبوں اور کینسر کے مریضوں کو؟

پاکستان مسلم لیگ(ن) کی ترجمان مریم اورنگزیب نے مزید کہا کہ عمران صاحب کسے بے وقوف بنانے کی کوشش کر رہے ہیں؟