یوم علیؓ ، اعتکاف، شب قدر اور جمعتہ الوداع کے لئے گائیڈ لائنز جاری کردی گئی ہے ۔

تفصیلات کے مطابق نیشنل کمانڈ اینڈ آپریشن سینٹر (این سی او سی) کی جانب سے گائیڈ لائنز جاری کی گئی ہیں ، ان پرعمل درآمد کے لئے سختی کی بھی ہدایت کی گئی ہے۔

یوم علیؓ

جاری کردہ گائیڈ لائنز میں کہا گیا ہے کہ یوم علیؓ پر ایس او پیز پر مکمل عمل درآمد یقینی بنایاجائے۔ یوم علیؓ پر کورونا علامات والے افراد کو مجالس میں شرکت کی اجازت نہ دی جائے۔ یوم علیؓ کی مناسبت سے مجالس آن لائن ہوں یا پھر آؤٹ ڈور منعقد کی جائیں۔ علماء اور ذاکرین کو کورونا منفی رپورٹ ہونے پر ہی خطاب کی اجازت دی جائے۔

اعتکاف

کورونا علامات والے افراد مسجد کے بجائے گھر میں ہی اعتکاف کریں، معتکفین مسجد میں بستر سمیت دیگر سامان گھر سےلائیں اور مشترکہ سحر و افطار سے گریز کریں۔

جمعتہ الوداع

جمعتہ الوداع کے لئے نمازی جائےنماز ساتھ لائیں اور وضو گھر سے کرکے آئیں۔ جمعتہ الوداع کے اجتماعات میں نمازیوں کے آنے اور جانے کا الگ راستہ رکھا جائے، داخلی راستے پر تھرمل اسکیننگ اور سینیٹائزر کا بندوبست یقینی بنایا جائے، صفوں کے درمیان فاصلہ رکھا جائے وضوخانوں میں بھیڑ نہ لگائی جائے۔

شب قدر

مساجد میں شب قدر کی مناسبت سے طاق راتوں میں ہونے والے اجتماعات میں بچے اور 50 سال سے زیادہ عمر کے افراد نہ آئیں۔