وزیرِاعظم عمران خان نے کہا ہے کہ عوامی ضروریات کے پیش نظر ترقیاتی عمل میں نجی شعبے کی بھرپور شراکت وقت کی اہم ضرورت ہے۔

تفصیلات کے مطابق وزیرِاعظم عمران خان کی زیر صدارت اجلاس ہوا جس میں متعدد شعبوں میں زیر تکمیل اور جلد مکمل ہونے والے منصوبوں کے حوالے سے بریفنگ دی گئی۔

اجلاس میں پبلک سیکٹر ڈویلپمنٹ پروگرام کے تحت مختلف ترقیاتی منصوبوں خصوصاً نجی شعبے کی شراکت سے پایہ تکمیل تک پہنچنے والے مختلف منصوبوں پر بریفنگ دی گئی۔

بریفنگ کے دوران بتایا گیا کہ پبلک پرائیویٹ پارٹنرشپ ماڈل کے تحت پچاس منصوبوں پر کام مختلف مراحل پر ہے، ان منصوبوں کی کل مالیت دو ہزار ارب روپے ہے۔

بریفنگ میں کہا گیا ہے کہ چودہ منصوبے جن کی مالیت978ارب ہے آئندہ تین ماہ میں منظور ہو جائیں گے جبکہ 1016 ارب مالیت کے اٹھارہ منصوبے مالی سال 2021-22 میں ایوارڈ کئے جائیں گے۔

بریفنگ کے دوران وزیراعظم کو بتایا گیا کہ سیالکوٹ کھاریاں موٹر وے منصوبے کا ٹینڈر جاری کر دیا گیا ہے جبکہ سکھر حیدرآباد موٹر وے منصوبے کا ٹینڈر جون میں جاری کر دیا جائے گا۔

بریفنگ کے دوران یہ بھی بتایا گیا کہ پبلک پرائیویٹ پارٹنر شپ ماڈل کے تحت جاری ان منصوبوں میں مواصلات، صحت، سائنس اینڈ ٹیکنالوجی، سوشل سیکٹر و وغیرہ شعبوں سے متعلقہ منصوبے شامل ہیں۔

اجلاس کو پی ایس ڈی پی پلس کے حوالے سے بریفنگ دیتے ہوئے کہا گیا کہ پی ایس ڈی پی پلس حکمت عملی کے تحت ترقیاتی عمل میں نجی شعبے کی شمولیت کو یقینی بنانے کے لئے موافق فضا فراہم  اور دیگر ضروری معاونت فراہم کی جاتی ہے۔

بریفنگ دیتے ہوئے مزید کہا گیا کہ پی ایس ڈی پی پلس کے تحت 180 اقدامات کی نشاندہی کی جا چکی ہے جن کی کل مالیت کا تخمینہ 5.5 ٹریلین روپے لگایا گیا ہے۔

اجلاس کی صدارت کرتے ہوئے وزیراعظم عمران خان نے کہا کہ حکومت نجی شعبے کو ترقیاتی عمل میں بھرپور طریقے سے شامل کرنے اور ان کو موافق فضاء کی فراہمی کے لئے مکمل طور پر پر عزم ہے۔

عمران خان نے یہ بھی کہا کہ بیرون ملک اور اندورون ملک سرمایہ کاروں کو آسانیاں فراہم کرنے کے لئے سرمایہ کاری بورڈ کو متحرک کر رہے ہیں۔

 وزیراعظم عمران خان نے مزید کہا کہ فیڈرل اور صوبائی ترقیاتی منصوبوں پر عمل درآمد کی پیش رفت رپورٹ ، مستقبل کے ترقیاتی منصوبوں کے ساتھ ساتھ علاقائی سطح پر ترقیاتی منصوبوں کی تقسیم اور ان پر اب تک کی گئی پیش رفت کی  تمام تر تفصیلات پیش کی جائیں۔

اجلاس میں وزیرِ منصوبہ بندی اسد عمر، وزیرِ خزانہ شوکت ترین ، متعلقہ وزارتوں کے سیکرٹری صاحبان اور سینئر افسران بھی شریک ہوئے جبکہ وزیرِاعلیٰ پنجاب سردار عثمان بزدار اور صوبائی وزیر خزانہ ہاشم جوان بخت و صوبائی حکام نے بھی ویڈیو لنک کے ذریعے شرکت کی۔