وزیراعظم عمران خان نے کہا ہے کہ موجودہ حکومت انضمام شدہ علاقوں کی تعمیر و ترقی کے لئے پرعزم ہے۔

تفصیلات کے مطابق وزیراعظم عمران خان کی زیر صدارت انضمام شدہ علاقوں میں ترقیاتی منصوبوں کی پیش رفت کے حوالے سے اجلاس ہوا جس میں انضمام شدہ علاقوں میں جاری ترقیاتی منصوبوں میں پیش رفت کا تفصیلی جائزہ لیا گیا۔

اجلاس کو وفاق کی جانب سے انضمام شدہ علاقوں کے لئے جاری شدہ رقوم اور اب تک کے اخراجات کے حوالے سے تفصیلی بریفنگ دی گئی۔

بریفنگ میں کہا گیا کہ انضمام شدہ علاقوں کے حوالے سے اب تک 217 منصوبوں کی منظوری دی جا چکی ہے جن میں تعلیم، صحت، آب پاشی، سپورٹس، لاء اینڈ جسٹس، زراعت، توانائی، پینے کا صاف پانی وغیرہ جیسے منصوبے شامل ہیں۔

وزیراعظم عمران خان نے کہا کہ مشکل مالی حالات اور کورونا کے باوجود رواں سال کے لئے وفاق کی جانب سے انضمام شدہ علاقوں کے لئے 48 ارب روپے کے ریکارڈ ترقیاری فنڈز کی فراہمی ہمارے عزم کا منہ بولتا ثبوت ہے۔

وزیراعظم نے کہا کہ انضمام شدہ علاقوں کے حوالے سے  آئندہ سال کے بجٹ میں مقامی قیادت اور عوامی نمائندگان کی مشاورت سے ان منصوبوں کو ترجیح دی جائے۔

عمران خان نے یہ بھی کہا کہ یہ وہ منصوبے جو عوام کی فوری ضرورت ہیں ۔ یہ منصوبے براہ راست اور کم ترین مدت میں عوام کے لئے فائدہ مند ثابت ہوں گے۔

وزیراعظم نے کہا کہ ترقیاتی منصوبوں کی پیش رفت کی مانیٹرنگ اور مقررہ اہداف کے بروقت حصول پر نظر رکھنے کے لئے وفاق اور صوبائی حکومت کے نمائندگان پر مبنی کمیٹی تشکیل دی جائے۔

عمران خان نے یہ بھی کہا کہ انضمام شدہ علاقوں میں جاری ترقیاتی عمل کے حوالے سے عوام کو ساتھ ملایا جائے تاکہ ترقیاتی عمل عوام کی حمایت سے آگے بڑھایا جائے۔

وزیراعظم عمران خان نے مزید کہا کہ عوام کو انصاف کی فراہمی کے حوالے سے وزیر اعظم نے  خاص طور پر ہدایت کی کہ اس امر کی طرف خصوصی توجہ دی جائے۔

اجلاس میں وزیر برائے منصوبہ بندی اسد عمر، وزیر برائے مذہبی امور پیر نورالحق قادری، وزیر اعلیٰ خیبر پختونخواہ محمود خان ، وزیر مملکت برائے اطلاعات فرخ حبیب، صوبائی وزیرِ خزانہ تیمور خان جھگڑا نے شرکت کی جبکہ ممبران قومی اسمبلی گل ظفر خان، ساجد خان، محمد اقبال آفریدی، ملک فخر زمان اور متعلقہ وفاقی و صوبائی حکومتوں کے سینئر افسران بھی شریک ہوئے۔