وزیراعظم عمران خان نے کہا ہے کہ موجودہ حکومت جنوبی پنجاب کی ترقی کے لئے ہر ممکن اقدامات اٹھائے گی۔

تفصیلات کے مطابق وزیراعظم عمران خان سے جنوبی پنجاب سے تعلق رکھنے والے ممبران قومی و صوبائی اسمبلی کی ملاقات ہوئی جس میں عوامی فلاحی، ترقیاتی اور جنوبی پنجاب سیکرٹریٹ کے قیام کے حوالے سے امور پر گفتگو کی گئی۔

ممبران نے اپنے متعلقہ حلقوں میں عوام الناس کو درپیش مسائل کے حل بالخصوص سڑکوں، پینے کے صاف پانی کی فراہمی اور سیوریج سمیت دیگر بڑے ترقياتی منصوبوں کے حوالے سے تجاویز پیش کیں۔

ممبران نے وزیراعظم کی جنوبی پنجاب میں خصوصی دلچسپی اور فلاحی و ترقیاتی منصوبوں کے حوالے سے ترجیحات مرتب کرنے پر وزیر اعظم کا شکریہ ادا کرتے ہوئے کہا کہ ماضی میں جنوبی پنجاب کے عوام کو نظر انداز کیا گیا لیکن موجودہ حکومت نے حقیقی معنوں میں جنوبی پنجاب کی ترقی و خوشحالی کے ویژن پر عملدرآمد ممکن بنارہی ہے۔

وزیراعظم عمران خان نے ممبران کو اپنے متعلقہ حلقوں میں عوام الناس کو درپیش مسائل کے حل کو ترجیحی بنیادوں پر ممکن بنانے کی ہدایت کرتے ہوئے بھرپور تعاون کی یقین دہانی کرائی اور کہا کہ مجوزہ ترقیاتی منصوبوں کے حوالے سے سفارشات کی تر جیحی بنیادوں پر حتمی منظوری دینے کے لئے وہ جلد ہی اجلاس کی صدارت کریں گے ۔

عمران خان نے یہ بھی کہا کہ ماضی میں جنوبی پنجاب  وسائل کی غیر منصفانہ تقسیم کی بدولت ترقی کے سفر میں پیچھے رہ گیا۔ پاکستان تحریک انصاف کی حکومت جنوبی پنجاب کی ترقی کے لئے ہر ممکن اقدامات اٹھائے گی۔

وزیراعظم عمران خان نے مزید کہا کہ پاکستان میں خوشحالی  اور معاشی ترقی قانون کے  یکساں اطلاق اور عوام کوانصاف کی  یکساں فراہمی سے ہی یقینی بنائی جا سکتی ہے۔

ملاقات میں وفاقی وزیر برائے صنعت مخدوم خسرو بختیار، وزیر اعلیٰ پنجاب سردار عثمان بزدار ، صوبائی وزیر خزانہ مخدوم ہاشم جواں بخت، ممبران قومی اسمبلی میں فاروق اعظم، رانا قاسم ، سردار نصراللہ خان ، طاہر اقبال، عبدالغفار ، میاں شفیق ، سردار عامر طلال ، ممبر صوبائی اسمبلی پنجاب سمیع اللہ چوہدری نے شرکت کی۔