وزیراعظم عمران خان نے کہا ہے کہ ہمیں اناج پیدا کرنے کے لئے زمینوں کو سیراب کرنا ہے۔

تفصیلات کے مطابق وزیراعظم عمران خان نے ضلع مہمند کا دورہ کیا اور مہمند ڈیم کی تعمیر میں پیش رفت کا جائزہ لیا۔

وزیراعظم عمران خان نے مہمند ڈیم کے دورے کے موقع پر صحافیوں سے گفتگو میں ماضی کی حکومتوں کو ایک بار پھر تنقید کا نشانہ بنایا۔

وزیر اعظم نے کہا کہ ماضی میں ڈیم کے بجائے بجلی کے مہنگے منصوبے لگائے گئے، مہنگےمنصوبوں سے بجلی خریدیں یا نہ خریدیں، ادائیگی کرنا پڑتی ہے۔

عمران خان نے یہ بھی کہا کہ ہم پاکستان میں پانی سے 50 ہزار میگا واٹ بجلی بناسکتے ہیں۔

وزیراعظم کا کہنا تھا کہ ہم نے کچھ نہ کیا تو آنے والے سالوں میں اناج کا بحران پیدا ہوسکتا ہے۔ پانی، اناج اور توانائی جیسے مسائل ڈیموں کی تعمیر سے حل ہوں گے۔

عمران خان کا یہ بھی کہنا تھا کہ فوڈ سیکیورٹی کے لیے ہم مکمل پلان لے کر آرہے ہیں، ہمیں اناج پیدا کرنے کے لئے زمینوں کو سیراب کرنا ہے، ڈیموں کی تعمیر سے 80 لاکھ ایکڑ زمین سیراب ہوسکے گی۔

وزیراعظم نے کہا کہ ہم نے اگلے الیکشن کا نہیں بلکہ قوم کے مستقبل کے لیے سوچا ہے، کرونا کی موجودہ لہر فلیٹ ہو چکی ہے احتیاط جاری رکھی تو سیاحت سمیت سب شعبے کھل جائیں گے۔

عمران خان نے یہ بھی کہا کہ آئی پی پیز کے ساتھ نئے معاہدے کرکے کافی بچت کی ہے، ماضی کی حکومتوں نے جلد بازی میں معاہدے کرکے آئی پی پیز سے پیسے کھائے، جس قیمت پر بجلی بن رہی ہے اس سے کم قیمت پہ فروخت ہورہی ہے۔

وزیراعظم عمران خان نے مزید کہا کہ 2023 تک گردشی قرضہ 1455 ارب روپے پر پہنچ جائے گا، 2028 تک پانی کے 10بڑے پراجیکٹ مکمل ہوجائیں گے۔