کورونا کی صورتحال میں بہتری کے بعد نیشنل کمانڈ اینڈ آپریشنز سینٹرنے پابندیوں میں نرمی کردی۔

 تفصیلات کے مطابق وفاقی وزیر منصوبہ بندی اسد عمر کی زیر صدارت نیشنل کمانڈ اینڈ آپریشنز سینٹر ( این سی او سی) کا خصوصی اجلاس ہوا۔

اجلاس میں معاون خصوصی برائے صحت، وزیر صحت سندھ اور تمام صوبوں کے چیف سیکریٹریز  نے بذریعہ ویڈیو لنک شرکت کی۔

این سی او سی کے مطابق اجلاس میں 24 مئی سے مختلف سیکٹرز کھولنے کا فیصلہ کیا گیا ہے جبکہ ریسٹورنٹس میں آوٹ ڈور سروس اور سیاحتی مقامات بھی کھولنے کا فیصلہ کیا گیا ہے،آوٹ ڈور ڈائننگ کی اجازت رات 12 بجے تک ہوگی۔

این سی او سی کا کہنا ہے کہ 5 فیصد سے کم شرح والے اضلاع میں یکم جون سے تعلیمی اداروں کو بھی کھولنے کا فیصلہ کیا گیا ہے۔

این سی او سی کے مطابق شعبہ تعلیم میں جو ادارے 24 مئی سے نہیں کھلیں گے انکو 7 جون سے کھول دیا جائے گا جبکہ میٹرک اور انٹر کے امتحانات 20 جون سے کرائے جا سکیں گے۔

این سی او سی کا کہنا ہے کہ یکم جون سے 150 افراد کے ساتھ آؤٹ ڈور شادی ہال میں تقریبات کی اجازت ہوگی تاہم ہر قسم کی سپورٹس اور کلچر سرگرمیوں پر پابندی رہے گی جبکہ مزار ، سینما ، انڈور ڈائیننگ، انڈور جم اور تفریحی مقامات بھی بند رہیں گے۔

این سی او سی کا مزید کہنا ہے کہ ہفتے میں دو دن کاروباری مراکز بند رہیں گے اور یکم جون سےکھولےجانے والے سیکٹرز کا جائزہ27 مئی کولیاجائےگا۔