وزیراعلیٰ پنجاب سردار عثمان بزدار نے کہا ہے کہ شہری جس قدر احتیاط کریں گے اتنا ہی کورونا کیسز میں کمی آئے گی۔

تفصیلات کے مطابق وزیراعلیٰ پنجاب سردار عثمان بزدار نے اپنے ایک بیان میں کہا کہ کورونا وباء خطرناک صورتحال اختیار کر رہی ہے، رمضان المبارک کے آخری ایام میں عوام کو بہت زیادہ احتیاط کرنے کی ضرورت ہے۔

عثمان بزدار کا کہنا تھا کہ عید کی تعطیلات کے دوران حکومتی گائیڈ لائنز پر عمل کرنے سے وباء کا پھیلاؤ روکنے میں مدد ملے گی، شہری بلا ضرورت گھر وں سے نہ نکلیں۔

انہوں نے کہا کہ حکومت نے صورتحال کے تناظر میں لاک ڈاؤن کا مشکل فیصلہ کیا ہے۔

عثمان بزدار کا کہنا تھا کہ کورونا سے بچاؤ کے لئے ویکسینیشن کا عمل تیزی سے جاری ہے تاہم  ویکسینیشن سینٹرز کی تعداد میں اضافہ کر دیا گیا ہے، شہری کورونا ویکسین ضرور لگوائیں۔

انہوں نے کہا کہ 50  سال سے زائد عمر کے شہری صرف شناختی کارڈ دکھا کر کورونا ویکسین کی سہولت سے فائدہ اٹھائیں جبکہ  40 سال سے زائد عمر کے افراد کے لئے  بھی رجسٹریشن کے ذریعے ویکسینیشن شروع کر دی گئی ہے۔

وزیراعلیٰ پنجاب سردار عثمان بزدار کا مزید کہنا تھا کہ شہری کورونا ویکسین ضرور لگوائیں ،یہ کورونا سے بچاؤ کے لئے ضروری ہے۔