ایران کے وزیر خارجہ جواد ظریف نے معافی مانگ لی ہے۔

خبر ایجنسی کے مطابق آڈیو کلپ میں امریکی حملے میں ہلاک ہونے والے انتہائی مقبول جنرل قاسم سلیمانی پر شدید تنقید کی گئی تھی، ایرانی وزیر خارجہ نے دو ماہ بعد ہونے والے صدارتی الیکشن میں حصہ نہ لینے کا اعلان کرتے ہوئے جنرل قاسم سلیمانی کے اہل خانہ اور ایرانی عوام سے ’’لیک آڈیو‘‘ کے مندرجات پر معافی مانگی ہے۔

انہوں نے ٹویٹر پر اپنے وضاحتی بیان میں کہا کہ ایران کے عظیم لوگ جنرل قاسم سلیمانی سے محبت کرنے والے ہیں۔ گزشتہ ہفتے اپنی منظر عام پر آنے والی آڈیو کلپ پر معافی مانگتا ہوں۔

انہوں نے کہا کہ امید کرتا ہوں کہ جنرل قاسم سلیمانی کے اہل خانہ مجھے معاف کردیں گے۔

خیال رہے کہ گزشتہ ہفتے وزیر خارجہ جواد ظریف کی ایک آڈیو ریکارڈنگ لیک ہوئی ہے جس میں انہوں نے کہا تھا کہ جنرل قاسم سلیمانی کے روس کے ساتھ علیحدہ تعلقات پر اعتراض کیا تھا اور شام میں کارروائیوں کے لیے قومی ائیر لائن کا استعمال روکنے کی درخواست کی تھی جسے جنرل صاحب نے مسترد کردیا تھا۔

سات گھنٹے کی آڈیو میں جواد ظریف بار بار یاد دہانی کراتے رہے کہ یہ انٹرویو پبلک کرنے کے لئے نہیں ہے۔

جواد ظریف نے کہا کہ اگر مجھے معلوم ہوتا کہ اس انٹرویو کا ایک جملہ بھی عام کر دیا جائے گا تو میں ان باتوں کا کبھی تذکرہ نہیں کرتا۔