پاکستان مسلم لیگ (ن) کی ترجمان مریم اورنگزیب نے کہا ہے کہ پاکستانی عوام کے بعد اب بیرون ملک پاکستانیوں کو نیا سبز باغ دکھایا جا رہا ہے۔

تفصیلات کے مطابق پاکستان مسلم لیگ (ن) کی ترجمان مریم اورنگزیب نے  وزیراعظم عمران خان کو جواب دیتے ہوئے کہا کہ الیکڑانک ووٹنگ مشین کا نیا شگوفہ چھوڑ کر عمران صاحب الیکشن چوری کا نیا منصوبہ تیار کر رہے ہیں۔

 مریم اورنگزیب نے کہا کہ ڈسکہ میں الیکشن کمیشن کا عملہ چوری کرنے والے الیکشن اصلاحات پہ لیکچر نہ دیں، آپ جیسے ووٹ چور کے مسلط ہوتے ہوئے الیکشن اصلاحات نہیں ہو سکتیں۔

مریم اورنگزیب نے حکومت پر تنقید کرتے ہوئے کہا کہ جہاں ایک حکم پر آر ٹی ایس بیٹھ جاتا ہے، وہاں الیکڑانک مشین بے چاری کیا کرے گی؟

مریم اورنگزیب نے یہ بھی کہا کہ آر ٹی ایس بٹھا کر ووٹ چوری سے قوم پر مسلط ہونے والے الیکڑانک ووٹنگ مشین کا نام کس منہ سے لے رہے ہیں؟  الیکڑانک ووٹنگ مشین کا تجربہ پوری دنیا میں نا کام ہوچکا ہے۔

‎مریم اورنگزیب کا کہنا تھا کہ الیکشن کمیشن آف پاکستان نے جو اسٹڈی کرائی تھی، اس میں بھی الیکڑانک ووٹنگ کے طریقے کو ناقابل عمل قرار دیا گیا تھا۔

‎ انہوں نے کہا کہ عمران صاحب آپ کے الیکشن چوری کے منصوبوں اور بدنیتی پر مبنی پروگرام کامیاب نہیں ہونے دیں گے۔

‎مریم اورنگزیب نے یہ بھی کہا کہ جدید ترین ٹیکنالوجی کے حامل ممالک میں بھی یہ تجربہ ناکام رہا ہے ۔

‎انہوں نے کہا کہ عمران صاحب یہ 2018 نہیں بلکہ 2021 ہے، عوام سے آپ کے جھوٹے وعدوں کی طرح اب کوئی نیا الیکشن فراڈ نہیں چلے گا۔

‎مریم اورنگزیب کا مزید کہا تھا کہ عمران صاحب کو بیرون ملک پاکستانیوں کے ووٹ کی نہیں، بلکہ ان کے چندوں سے ہونے والی آمدن کی زیادہ فکر ہے۔