وزیراعلیٰ پنجاب کی معاون خصوصی برائے اطلاعات فردوس عاشق اعوان نے کہا ہے کہ عمران خان نے پولٹری کے بزنس کو ریگولیٹ کرنے کا فیصلہ کیا ہے۔

تفصیلات کے مطابق وزیراعلیٰ پنجاب کی معاون خصوصی برائے اطلاعات فردوس عاشق اعوان نے پریس کانفرنس کرتے ہوئے کہا کہ چینی مافیا ،آٹا مافیا کا مقابلہ کیا ،اب پولٹری کےمافیا سے بھی مقابلہ کیا جائے گا۔

وزیراعلیٰ پنجاب کی معاون خصوصی نے کہا کہ عمران خان نے پولٹری کے بزنس کو ریگولیٹ کرنے کافیصلہ کیا ہے۔ یہ دیکھنا ہوگا کونسا خاندان پولٹری کےکاروبار سے جڑا ہے، اپنا ہو یا بیگانہ اب کرپشن کرنے والا بچ نہیں پائے گا۔

فردوس عاشق اعوان نے یہ بھی کہا کہ وزیراعظم نےکرپشن روکنے کے لئے عوام سےمینڈیٹ لیاتھا، راولپنڈی رنگ روڈ منصوبے میں غیر قانونی طریقے سے روٹ تبدیل کیا گیا جس کی انکوائری کا حکم وزیراعظم نے دے دیا ہے۔

وزیراعلیٰ پنجاب کی معاون خصوصی کا کہنا تھا کہ اسلام آباد راولپنڈی میں ٹریفک لوڈ کم کرنےکیلئے رنگ روڈ راولپنڈی کامنصوبہ شروع کیاگیا، منصوبےکوپایہ تکمیل تک پہنچانےکیلئےٹائم لائن اور روڈ میپ طےکیا گیا ہے۔

فردوس عاشق اعوان کا یہ بھی کہنا تھا کہ سابق کمشنر محمود احمد نےکئی غیرقانونی کام کئے۔سابق کمشنر اور ان کے ساتھیوں نے اپنے مفادات کے لئے قومی خزانے کا غلط استعمال کیا۔

وزیراعلیٰ پنجاب کی معاون خصوصی نے کہا کہ پنجاب اور وفاق کی حکومتوں کو حقائق سے لا علم رکھا گیا۔

فردوس عاشق اعوان نے یہ بھی کہاکہ سابقہ کمشنر نے نجی ہاؤسنگ اسکیموں کے لئے بھی کام کیا، ایف آئی اے کو نجی ہاؤسنگ اسکیموں کے فرانزک آڈٹ کا حکم دے دیا ہے۔

وزیراعلیٰ پنجاب کی معاون خصوصی کا کہنا تھا کہ انکوائری رپورٹ متعلقہ اداروں کو بھیجی جا چکی ہے، اس منصوبے کے لئے پیشکش جمع کرانے کا عمل منسوخ کر دیا گیا،اسے قانونی طور پر ریگولرائز نہیں کیا جا سکے گا۔

فردوس عاشق اعوان نے کہا کہ کاروباری افراد کو نیب کے حوالے کیا جارہا ہے، اس منصوبےسےجڑےذاتی مفادکے راستے میں قانونی دیواریں کھڑی کی ہیں۔

وزیراعلیٰ پنجاب کی معاون خصوصی برائے اطلاعات فردوس عاشق اعوان نے مزید کہ وزیر اعظم کی ہدایت پر تمام گٹھ جوڑ کو انجام تک پہنچایا جائےگا۔