پاکستان پیپلز پارٹی کے سیکرٹری جنرل سید نیر حسین بخاری نے کہا ہے کہ حکومت نے پارلیمان کو مفلوج بنا کر رکھ دیا ہے۔

تفصیلات کے مطابق پاکستان پیپلز پارٹی کے سیکرٹری جنرل سید نیر حسین بخاری نے قوم کو پارلیمنٹ کے ذریعے وزیراعظم کے دورہ سعودی عرب سے آگاہ کرنے اور دورے سے متعلق تفصیلات سے پارلیمان کو اعتماد میں لینے کا مطالبہ کیا ہے ۔

سید نیر حسین بخاری نے کہا کہ وزیراعظم کے دورے سے متعلق مختلف خبریں سامنے آرہی ہیں حکومت  تمام تفصیلات پارلیمان کے سامنے رکھے۔

پاکستان پیپلز پارٹی کے سیکرٹری جنرل نے کہا کہ بتایا جائے کہ دورے میں کشمیر کے معاملے پر کیا بات چیت ہوئی  اور اگر کوئی بات ہوئی تو کیا طے پایا ہے؟ قوم کو پارلیمنٹ کے ذریعے آگاہ کیا جائے۔

سید نیر حسین بخاری نے یہ بھی کہا کہ پاکستان کے بھارت کے ساتھ بیک ڈور رابطوں کی خبریں بھی سامنے آ رہی ہیں۔ کیا یہ حقیقت ہے بھارت کے ساتھ بیک ڈور رابطے ہیں اور اگر ہیں تو حقائق سے پارلیمان کو اعتماد میں لیں۔

پاکستان پیپلز پارٹی کے سیکرٹری جنرل سید نیر حسین بخاری نے مزید کہا کہ موجودہ حکومت کی ناقص خارجہ پالیسی کے باعث کئی سوالات اٹھ رہے ہیں، پیپلزپارٹی اہم معاملات میں پارلیمان کو بائے پاس کرنے کی اجازت کسی صورت نہیں دے گی۔