وزیر اعظم عمران خان نے کہا ہے کہ اسلامو فوبیا کے خلاف متحد ہو کر اس سے نمٹا جائے گا۔

تفصیلات کے مطابق وزیراعظم عمران خان  نے مسلم ممالک کے سفیروں سے ملاقات کی ہے جبکہ او آئی سی  کے رکن ممالک کے سفیروں سے بھی ملاقات کی ہے۔

ملاقات میں اسلاموفوبیا سے نمٹنے اور بین المذاہب ہم آہنگی پر بات چیت کی گئی ہے۔

وزیراعظم نے ملاقات میں مسلم عالمی رہنماؤں کو لکھے دو خطوط  کا حوالہ دیا ہے۔

عمران خان نے کہا کہ اسلامو فوبیا کے خلاف عالمی سطح پر مسلم امہ کی طرف سے آگاہی پھیلائی جائے گی۔

وزیر اعظم عمران خان نے کہا کہ اسلامو فوبیا کے خلاف پاکستانی اقدامات کا مقصد باہمی افہمام و تفہیم اور بین المذاہب ہم آہنگی پھیلانا ہے۔

عمران خان نے اسلامو فوبیا کے خلاف پاکستان کی کوششوں سے آگاہ کیا ہے اور اسلامو فوبیا کے خلاف مشترکہ لائحہ عمل بنانے پر زور دیا ہے۔

ملاقات میں وزیراعظم  نے اسلامو فوبیا سےمتعلق آگاہی پیدا کرنے پر بھی زور دیا ہے۔

اعلامیے میں وزیراعظم نے اسلاموفوبیا کے تدراک کے لئے کوششوں سے آگاہ کیا ہے۔

ملاقات میں اسلاموفوبیا کا مقابلہ کرنے اور بین المذاہب ہم آہنگی کےفروغ پر بھی گفتگو کی گئی ہے۔

وزیر اعظم نے کہا کہ اسلامو فوبیا مذاہب کے درمیان منافرت اورعدم استحکام کا باعث ہے ،دنیا کو اسلامو فوبیا کے بڑھتے واقعات پر توجہ دینے کی ضرورت ہے۔

انہوں نے کہا کہ  دہشتگردی کو اسلام سے جوڑنا مسلمانوں کی بدنامی کا باعث ہے۔

عمران خان نے یہ بھی کہا کہ مقدس ہستیوں کے خلاف اقدامات سے مسلمانوں کی دل آزاری ہوتی ہے اس لئے  دنیا کو اس حساسیت سے آگاہ کرنے کے لئے مشترکہ طور پر کام کرنا چاہیے۔

عمران خان کا کہنا تھا کہ دنیا کو بتانا ہو گا ہمارے دلوں میں نبی کریمﷺ کا کتنا احترام ہے۔

وزیراعظم نے کہا کہ دنیا بھر کے مذاہب کے مقدسات کو قانونی تحفظ دینے کی ضرورت ہے۔

وزیراعظم کا مزید کہنا تھا کہ پاکستان دنیا کے ممالک کے ساتھ باہمی احترام کے تعلقات چاہتا ہے۔