وزیراعلیٰ پنجاب سردار عثمان بزدار نے رات گئے لاہور شہر کا بغیر پروٹوکول دورہ کیاہے۔

تفصیلات کے مطابق وزیراعلیٰ پنجاب عثمان بزدار نے جیل روڈ، فیروز پور روڈ ، گلبرگ ، گارڈن ٹاؤن ، ماڈل ٹاؤن اور دیگر علاقوں میں لاک ڈاؤن کی صورتحال کا جائزہ لیا۔

شہر میں دورے کے دوران وزیراعلیٰ پنجاب نے لاک ڈاؤن کی صورتحال پر اطمینان کا اظہار کیا۔

وزیراعلیٰ پنجاب نے مارکیٹوں اور بازاروں کی بندش کے حوالے سے بھرپور تعاون پر تاجر برادری سے اظہار تشکر کیا۔

عثمان بزدار نے کورونا ایس او پیز پر عملدرآمد یقینی بنانے پر انتظامیہ، پولیس، فوج اور رینجرز کی کارکردگی کو بھی سراہا۔

وزیراعلیٰ پنجاب کا کہنا تھا کہ لاک ڈاؤن کے حوالے سے شہریوں نے ذمہ داری کا مظاہرہ کیا ہے۔ لاک ڈاؤن شہریوں کے تحفظ کیلئے ہے۔ کورونا کی صورتحال کی 24 گھنٹے مانیٹرنگ کی جا رہی ہے۔ شہری مزید پابندیوں سے بچنا چاہتے ہیں تو حکومت کی ہدایات پر 100 فیصد عمل کریں۔

عثمان بزدار نے صفائی کے انتظامات کا بھی مشاہدہ کیا تاہم صفائی کی خراب صورتحال پر سخت برہمی کا اظہار کیا۔

وزیراعلیٰ پنجاب نے شہر میں صفائی کے انتظامات کو بہتر بنانے کا حکم دیتے ہوئے کہا کہ شہر میں صفائی کے انتظامات تسلی بخش نہیں ۔ صفائی کے انتظامات کو بہتر بنانے کےلیے موثر انداز میں کام کیا جائے۔