وزیر اعظم عمران خان کے نمائندہ خصوصی برائے مذہبی ہم آہنگی و مشرق وسطیٰ حافظ  طاہر محمود اشرفی نے کہا ہے کہ اسلام کو دہشت گردی اور فرقہ واریت سے جوڑنا بہت بڑ اظلم  ہے۔

تفصیلات کے مطابق وزیر اعظم عمران خان کے نمائندہ خصوصی برائے مذہبی ہم آہنگی و مشرق وسطیٰ حافظ طاہر محمود اشرفی نے  پریس کانفرنس کرتے ہوئے کہا  کہ وزیراعظم عمران خان اسی ہفتے سعودی عرب کے دورے پر جائیں گے۔

طاہر محمود اشرفی نے کہا کہ وزیر اعظم عمران خان کی دورے میں سعودی ولی عہد اور سعودی قیادت سے اہم ملاقاتیں ہوں گی جس میں پاکستان اور سعودی عرب کے درمیان معاہدوں پر دستخط بھی کیے جائیں گے۔

طاہر محمود اشرفی کا کہنا تھا کہ وزیراعظم نے آج او آئی سی کے سفراء سے اہم ملاقات کی ہے  جس میں او آئی سی کے سفراء نے وزیراعظم کے وژن کو سراہا اور تعاون کی یقین دہانی کرائی ہے۔

انہوں نے کہا کہ اس وقت سب سے بڑا مسئلہ اسلام کی تشریح کے حوالے سے ہے ،ملاقات میں ناموس رسالت کے حوالے سے تجاویز پر غور کیا گیا ہے جبکہ  وزیراعظم نے کہا کہ کاش ہم مغرب کو بتانے میں کامیاب ہوجائیں کہ ناموس رسالت ہمارے لئے اہم ہے۔

طاہر محمود اشرفی نے یہ بھی کہا کہ حکومت ناموس رسالت کے حوالے سے کوئی کمپرومائز نہیں کرے گی، وہ دن جلد آئے گا جب عالمی سطح پر ناموس رسالت کے حوالے سے قانون سازی ہوگی ،ناموس رسالت کے حوالے سے وزیر اعظم عمران خان کے موقف کی عالمی لیڈروں نے حمایت بھی کی ہے۔

طاہر محمود اشرفی کا کہنا تھا کہ اسلامی یونیورسٹی کے اندر جامعہ ملک سلمان بن عبد العزیز بنائی جائے گی جس میں 12 ہزار نمازی بیک وقت نماز ادا کر سکیں گے۔

انہوں نے کہا کہ عمران خان سعودی عرب میں طاق راتیں روزہ رسول اور بیت اللہ میں گزاریں گے۔

طاہر محمود اشرفی  نے یہ بھی کہا کہ ہمارا ایجنڈا امت مسلمہ کی وحدت اور اتحاد ہے۔

طاہر محمود اشرفی  نے کہا کہ وزیر اعظم نے سعودی عرب ایمبیسی سے متعلق شکایات پر سخت اقدامات کیے ہیں جبکہ بیرون ملک مقیم پاکستانیوں کے مسائل حل کرنا وزیراعظم عمران خان کی اولین ترجیح ہے۔

طاہر محمود اشرفی نے کہا کہ پاکستان کے اندر 7 ماہ میں توہین رسالت اور جبری مذہب کی تبدیلی کا ایک کیس بھی نہیں آیا ہے۔

طاہر محمود اشرفی کا کہنا تھا کہ یورپی یونین کی قرارداد حقائق کے خلاف ہے تاہم یورپی یونین اور امریکی سفراء کو دعوت دیتے ہیں کہ پاکستان آکر انسانی حقوق اور اقلیتی حقوق کا جائزہ لیں۔

طاہر محمود اشرفی نے یہ بھی کہا کہ کورونا میں اجتماعات کو روکا ہے جبکہ  اعتکاف پر کوئی پابندی عائد نہیں کی گئی ہے

طاہر محمود اشرفی  کا کہنا تھا کہ این سی او سی نے طاق راتوں، شب قدر اور نماز عید کے حوالے سے فیصلے کیے ہیں۔

طاہر محمود اشرفی نے کہا کہ حکومت نے کورونا کے باوجود مساجد کو بند نہیں کیا  ہے جبکہ مساجد میں ایس او پیز پر سختی سے عملدر آمد ہو رہا ہے ،اس حوالے سے پروپیگنڈہ کو مسترد کرتے ہیں۔

وزیر اعظم عمران خان کے نمائندہ خصوصی برائے مذہبی ہم آہنگی و مشرق وسطیٰ حافظ طاہر محمود اشرفی نے مزید کہا کہ پاکستان کے سعودی عرب سے تعلقات کے حوالے سے پروپیگنڈہ کیا گیا ہے جبکہ پاکستان کے عرب ممالک سے تعلقات بہترین ہیں