کوبے چک میں نجی کالج کی افتتاحی تقریب کے موقع پر معاون خصوصی ڈاکٹر فردوس عاشق اعوان نے میڈیا سے گفتگو کرتے ہوئے کہا کہ ہماری آدھی فوج اس قوم کی بیٹیاں ہیں۔

 تفصیلات کے مطابق معاون خصوصی ڈاکٹر فردوس عاشق اعوان نے میڈیا سے گفتگو کرتے ہوئے کہا کہ وزیر اعظم عمران خان اور وزیر اعلی پنجاب کا ایک پیغام لے کر آئی ہوں۔

انہوں نے کہا کہ وزیر اعظم عمران خان شرح خواندگی بڑھانے کے لئے کوشاں ہیں، اس ملک میں سب سے بڑا چیلنج معاشی محاذ پر آزادی حاصل نہ کرنا ہے۔ اس وجہ سے ہمیں کبھی فارن ،کبھی آئی ایم ایف اور کبھی ورلڈ بینک سے قرض لینا پڑا ہے۔

معاون خصوصی ڈاکٹر فردوس عاشق اعوان نے میڈیا سے گفتگو کے دوران مزید کہا کہ معاشی محاذ پر جنگ وہی جیتے گا جس کا ہیومن ریسورس ڈویلپ ہو گا۔ ہم معاشی محاذ پر خواتین کے بنیادی حقوق کی عدم فراہمی کے باعث پیچھے رہ گئے ہیں۔

انہوں نے مزید کہا کہ ہمیں ایک ماں ،بہن اور بیٹی ہونے پر فخر ہے، ہم اسوہ فاطمہ(س) پر چل کر دنیا اور آخرت میں کامیاب ہوں گے، ہماری بیٹیاں ثابت کریں گی کے وہ کسی سے کم نہیں ہیں۔

ڈاکٹر فردوس عاشق اعوان نے یہ بھی کہا کہ وزیر اعظم دو نہیں ایک پاکستان کی بات کر رہے ہیں کہ ایک ایسا ملک ہو جہاں سب کو یکساں حقوق میسر ہوں، امیر اور غریب کا فرق ختم ہو۔

مزید کہا کہ شاہی خاندان کی بیٹی چوری کرے اور عوام اس سے نہ پوچھے یہ کیسے ہو سکتا ہے۔ آپ عدالتوں میں پیش ہو کر ثابت کریں کے آپ نے عوام کا پیسہ نہیں  کھایا۔

انہوں نے کہا کہ عمران خان کی جدوجہد عوام کے لئے ہے۔  وہ اس معاشرے کو تھانے اور کچہری کی سیاست سے پاک کرنا چاہتے ہیں اور انشااللّٰہ اس گلے سڑے نظام کوبدلنے میں کامیاب ہوں گے۔

 معاون خصوصی ڈاکٹر فردوس عاشق اعوان نے یہ بھی کہا کہ ہندوستان اور ہمارا مقابلہ آئی ٹی سیکٹر میں ہے۔ ہم نے آئی ٹی کے محاذ پر ہندوستان کو پچھاڑنا ہے۔

مزید یہ کہ ہر ضلع کے اندر جدید ترین ٹیکنالوجی پر محیط ماں اور بچے کی حفاظت کے لئے لیب اور اسپتال بنایا جائے گا۔

معاون خصوصی نے یہ بھی کہا کہ جنہوں نے اقتدار کے مزے لوٹے وہ نہ اس شہر کو جدید یونیورسٹی اور نہ ہی جدید اسپتال دے سکے ہیں۔